काठमाडौं । कञ्चनपुरका पत्रकार खेम भण्डारीलाई अदालतले सुनाएको सजाय कार्यान्वयनका लागि प्रहरीले पक्राउ गरेको छ।
बिहीबार बिहान भीमदत्त नगरपालिका–१८ स्थित कटान क्षेत्रबाट उनलाई नियन्त्रणमा लिइएको कञ्चनपुर प्रहरीले जनाएको छ।
प्रहरी नायव उपरीक्षक टेकबहादुर रावतका अनुसार जिल्ला अदालत कञ्चनपुरको आदेश कार्यान्वयन गर्ने क्रममा भण्डारीलाई पक्राउ गरिएको हो।
निर्मला पन्तको बलात्कारपछि हत्या भएको घटनासम्बन्धी समाचार प्रकाशनका क्रममा गाली बेइज्जती गरेको ठहर गर्दै कञ्चनपुर जिल्ला अदालतले गत जेठ १ गते भण्डारीलाई दोषी ठहर गरेको थियो।
अदालतले उनलाई एक महिना कैद, १० हजार रुपैयाँ जरिवाना तथा एक लाख रुपैयाँ क्षतिपूर्ति तिर्ने फैसला सुनाएको थियो।
यो मुद्दा कञ्चनपुरका तत्कालीन प्रहरी उपरीक्षक दिल्लीराज बिष्टका छोरा किरण बिष्टले दायर गरेका थिए।
निर्मला पन्त हत्या प्रकरणमा तथ्य र प्रमाणबिनै आफ्नो नाम जोडेर समाचार प्रकाशित गरिएको दाबी गर्दै उनले कानूनी उपचार खोजेका थिए। किरण बिष्ट हाल राष्ट्रिय समाचार समितिमा पत्रकारका रूपमा कार्यरत छन्।
उल्लेखनीय छ, २०७५ साल साउन १० गते घरबाट पढ्न जाने भन्दै निस्किएकी किशोरी निर्मला पन्त अर्को दिन भीमदत्त नगरपालिकाको निम्बुखेडा क्षेत्रस्थित उखुबारीमा मृत अवस्थामा फेला परेकी थिइन्।
देशव्यापी चर्चा र चासोको विषय बनेको उक्त घटनाका दोषी व्यक्ति हालसम्म पहिचान हुन नसक्दा अनुसन्धान र न्याय प्रक्रियामाथि प्रश्न उठ्दै आएका छन्।
