सडक निर्माणका क्रममा ढुङ्गासहितको सुक्खा पहिरोमा परि घाइते भएका डोल्पाको काइके गाउँपालिका–७, का कार्यवाहक वडाध्यक्ष भीमबहादुर बूढाको उपचारका क्रममा निधन भएको छ ।
काइके गाउँपालिका–७, लावनमा सडक निर्माण भइरहेको स्थानमा माथिबाट एक्कासि ढुङ्गासहितको सुक्खा पहिरो खस्दा ३४ वर्षीय बूढा गम्भीर घाइते भएका थिए । पहिरोमा परी घाइते भएका बूढालाई स्थानीय र सुरक्षाकर्मीको सहयोगमा उद्धार गरी जिल्ला अस्पताल डोल्पा पुर्याइएको थियो ।
जिल्ला अस्पतालमा उपचार सम्भव नभएपछि थप उपचारका लागि नेपालगन्ज लगिएको बूढाकाे नेपालगन्जस्थित नर्सिङ होममा उपचारका क्रममा हिजाे शनिबार निधन भएको हो । बूढा २०७९ सालको स्थानीय तह निर्वाचनमा काइके गाउँपालिका–७, को वडा सदस्यमा निर्वाचित भएका थिए ।
उक्त वडाका वडाध्यक्ष काम विशेषले जिल्ला बाहिर रहेका कारण केही समयदेखि उनले कार्यवाहक वडाध्यक्षको जिम्मेवारी सम्हाल्दै आएका थिए ।