देशका विभिन्न जिल्लामा फैलिएकाे बर्डफ्लु सङ्क्रमण अहिले काठमाडौँ उपत्यका र काभ्रेपलाञ्चोकमा कायम रहेको छ । बर्डफ्लु सङ्क्रमण अधिकांश जिल्लामा नियन्त्रणमा आए पनि उपत्यका र काभ्रेमा अझै नियन्त्रणमा आउन नसकेकाे हाे ।
पशु सेवा विभागका अनुसार झापा, मोरङ, सुनसरी, महोत्तरी, बारा, चितवनलगायतका जिल्लामा अहिले सङ्क्रमण पूर्ण रूपमा नियन्त्रणमा आइसकेको छ । तर, उपत्यकाकाे तीन जिल्लामा सङ्क्रमणको अवस्था अहिले पनि यथावत् रहेकाे भए पनि काभ्रेपलाञ्चोकमा सङ्क्रमण तीव्र रूपमा फैलिरहेको विभागले जनाएकाे छ ।
देशभर बर्डफ्लु सङ्क्रमणका कारण ७ लाख ५४ हजार ५ सय पन्छी, १० लाख ९१ हजार ३०३ अण्डा तथा २ लाख ४३ हजार ६३५ केजी दाना नष्ट गरिएको छ भने विभागको तथ्यांकमा उल्लेख भएअनुसार काठमाडौँ उपत्यकाका तीन जिल्ला र काभ्रेमा मात्रै २ लाख ८६ हजार २७७ पन्छी, १ लाख ७९ हजार ६४ अण्डा र ७४ हजार केजी दाना नष्ट गरिएको छ ।
विभाले जोखिमयुक्त क्षेत्रको स्थलगत अनुगमन गरी संघीय र स्थानीय सरकारको समन्वयमा प्रतिवेदन तयार पारिएको र सोही आधारमा सङ्क्रमित क्षेत्रका पन्छी नष्ट गर्ने तथा सङ्क्रमण नियन्त्रणका अन्य उपाय कार्यान्वयन प्रक्रिया अघि बढाइएको विभागका चिकित्सक डा.उपाध्यायले जनाएका छन् ।
