सुनसरीको देवानगञ्ज गाउँपालिका–३, कप्तानगञ्जमा भएको घटना पछि उत्पन्न परिस्थितिका कारण सुरक्षा जोखिम र आन्दोलनका कारण आज विराटनगरका अधिकांश शैक्षिक सस्थामा पठनपाठन प्रभावित भएको छ ।
आइतबार राति कप्तानगञ्जमा दुई समूहबीच भएको झडप नियन्त्रणमा लिन नेपाल प्रहरीले गोली चलाउँदा एक स्थानीयको मृत्यु भएको थियो भने उक्त घटनामा अन्य ९ जना घाइते भएका थिए । घटनापछि स्थानीय क्षेत्रमा प्रदर्शन र विरोधका कार्यक्रम जारी रहेकाले स्थानीय प्रशासनले कर्फ्यु आदेश जारी गरेकाे थियाे ।
घटनाको विरोधमा हिजाे विराटनगरमा पनि प्रदर्शन भएको थियो । त्यसको निरन्तरतास्वरूप मंगलबार सुरक्षा अवस्था संवेदनशील बनेपछि विराटनगरका अधिकांश शैक्षिक संस्थाले पठनपाठन बन्द गरेका छन् ।
विराटनगर महानगरपालिकाले विद्यालय बन्द गर्ने औपचारिक निर्णय नगरे पनि महानगरको शिक्षा महाशाखाका प्रमुख रामप्रसाद ढुंगेलका अनुसार विद्यालयहरू आफैंले सुरक्षा अवस्थाको मूल्याङ्कन गर्दै कक्षा सञ्चालन नगर्ने निर्णय गरेका हुन् ।
उता, घटनाको प्रत्यक्ष प्रभाव परेको सुनसरीको देवानगञ्ज र हरिनगर गाउँपालिकाले भने शोकको रूपमा आज सार्वजनिक बिदा दिइएकाे छ । ती दुवै स्थानीय तहअन्तर्गतका सरकारी कार्यालय, शैक्षिक संस्था तथा अन्य सार्वजनिक निकाय बन्द रहेका छन् ।
उक्त घटना पछि प्रदर्शन र तनावका कारण सुनसरीको दक्षिणी भेगका अधिकांश विद्यालयहरू पनि बन्द रहेका छन् । स्थानीय प्रशासनले सम्भावित अप्रिय घटना रोक्न संवेदनशील क्षेत्रमा सुरक्षाकर्मीको परिचालन बढाइएको जनाएको छ ।
प्रशासनले सर्वसाधारणलाई अफवाहमा विश्वास नगर्न तथा शान्ति–सुरक्षा कायम राख्न सहयोग गर्न आग्रह गरेको छ भने गोलीकाण्डको घटनाबारे अनुसन्धान जारी रहेको र दोषीमाथि कानुनबमोजिम कारबाही हुने जनाइएको छ ।
