गएराति काठमाडौंको गोकर्णेश्वर नगरपालिका–५ पहेँलोपुल नजिक जम्बुडाँडामा शनिबार राति भएको आगलागीबाट एक काठ गोदामसहित १४ वटा व्यवसायिक सटरमा क्षति पुगेको छ । उक्त आगलागीमा एक जना घाइते भएका छन् ।
राति सवा ९ बजे रविन्द्र भट्टराईले सञ्चालन गरेको काठको गोदाम तथा त्यससँगै रहेका व्यवसायिक सटरमा विद्युत् सर्ट भएर आगलागी भएको प्रारम्भिक अनुसन्धानबाट खुलेको जिल्ला प्रहरी परिसर काठमाडौंले जनाएकाे छ ।
घटना बारे जानकारी प्राप्त हुनासाथ जिल्ला प्रहरी परिसर काठमाडौंबाट १००, विपद् व्यवस्थापन गुल्म सामाखुसीबाट २५ तथा सशस्त्र प्रहरी बल सिनामंगलबाट ५० गरी १७५ जना सुरक्षाकर्मी घटनास्थलमा परिचालन गरिएको थियो ।
आगो नियन्त्रणका लागि ९ वटा दमकल, ३ वटा पानी ट्यांकर र स्थानीयवासीसमेत परिचालन गरिएका थिए भने दुई घण्टाको प्रयासपछि राति ११ बजे आगो पूर्ण रूपमा नियन्त्रणमा आएको थियाे ।
आगो निभाउने क्रममा कागेश्वरी मनोहरा नगरपालिका–९ गोठाटारका ३७ वर्षीय नरेश थापा घाइते भएका छन् भने उनलाई प्रारम्भिक उपचार पछि राष्ट्रिय ट्रमा सेन्टर रेफर गरिएको प्रहरीले जनाएको छ ।
आगलागीबाट ओम काष्ठ मिल उद्योगसहित रिकन्डिसन तथा हेल्मेट पसल, बासु फर्निचर, घिसिङ अटो रिकन्डिसन, रङ पसल, प्रेम गौतम रिकन्डिसन, मोबाइल पसल, हार्डवेयर, मिठाई, चिया, फर्निचर, चटपटे तथा किराना, कस्मेटिक र स्टेशनरी पसलमा क्षति पुगेको छ ।
आगलागीबाट भएको क्षतिको विवरण आइनसकेकाे र घटनाबारे थप अनुसन्धान भइरहेको प्रहरीले जनाएको छ।
