काठमाण्डू, नेपाल एसोसिएसन अफ टुर एन्ड ट्राभल एजेन्ट्स (नाट्टा) को आगामी कार्यकाल (२०२६–२०२८) को नेतृत्वका लागि पर्यटन व्यवसायी प्रदीप आचार्यले अध्यक्ष पदमा उम्मेदवारी घोषणा गरेका छन्।
परिवर्तन, पारदर्शिता र व्यवसायीको सम्मान भन्ने मूल नारासहित उनले नाट्टालाई समयानुकूल, प्रविधिमैत्री र अन्तर्राष्ट्रिय स्तरमा प्रभावकारी संस्थाका रूपमा रूपान्तरण गर्ने प्रतिबद्धता व्यक्त गरेका छन्।
ड्युक नेपाल एडभेन्चरका प्रबन्ध निर्देशक आचार्य पर्यटन उद्योगमा सक्रिय युवा उद्यमीका रूपमा परिचित छन्।
उनी नेपालको पर्यटनलाई परम्परागत ढाँचाबाट बाहिर निकालेर नवप्रवर्तन, डिजिटल प्रविधि र विश्वव्यापी बजारसँग जोड्ने अभियानमा जोड दिँदै आएका छन्।
पर्यटन क्षेत्रको शैक्षिक र व्यावसायिक दुवै अनुभव बोकेका आचार्यले त्रिभुवन विश्वविद्यालय बाट ट्राभल एन्ड टुरिजम म्यानेजमेन्ट (एमटीटीएम) र व्यवस्थापन ९एमबीएस० मा स्नातकोत्तर गरेका छन्।
साथै नेपाल ल क्याम्पसबाट एलएलबी अध्ययन पूरा गरेका छन्।
पर्यटन, व्यवस्थापन र कानूनको संयुक्त ज्ञानले संस्थागत नेतृत्वलाई अझ प्रभावकारी बनाउने विश्वास उनले व्यक्त गरेका छन्।
राष्ट्रिय ताल संरक्षण विकास समिति का पूर्व कार्यकारी सदस्यसमेत रहेका आचार्यले पर्यटन नीति सुधार, दिगो पर्यटन, निजी क्षेत्रको सशक्तीकरण तथा सुशासनका विषयमा राष्ट्रिय र अन्तर्राष्ट्रिय मञ्चमा सक्रिय भूमिका खेल्दै आएका छन्।
पर्यटनसम्बन्धी अध्ययन, अनुसन्धान र नीतिगत बहसमार्फत पनि उनी परिचित छन्।
आचार्यका प्रमुख प्रतिबद्धता
नाट्टालाई पूर्ण रूपमा डिजिटल र प्रविधिमैत्री संस्था बनाउने।
पर्यटन व्यवसायीको पेशागत सुरक्षा, अधिकार र व्यवसायिक वातावरण सुदृढ गर्ने।
सरकारसँग समन्वय गरी पर्यटनमैत्री नीति तथा कानूनी सुधार अघि बढाउने।
नेपालको पर्यटनलाई नयाँ अन्तर्राष्ट्रिय बजार मा विस्तार गर्दै प्रभावकारी ब्रान्डिङ गर्ने।
अनुसन्धान, नवप्रवर्तन र आर्टिफिसियल इन्टेलिजेन्स (एआई) लगायत आधुनिक प्रविधिको प्रयोगलाई प्रोत्साहन गर्ने।
युवा उद्यमी, महिला तथा नयाँ पुस्ताका पर्यटन व्यवसायीलाई संस्थागत नेतृत्वमा अवसर दिने।
नाट्टालाई सदस्यमुखी, पारदर्शी र उत्तरदायी संस्थाका रूपमा विकास गर्ने।
आचार्यले पर्यटन क्षेत्रको भविष्य सामूहिक नेतृत्व, नवीन सोच र निजी क्षेत्रको सशक्त भूमिकामा निर्भर रहेको उल्लेख गर्दै नाट्टालाई व्यवसायीहरूको साझा आवाजका रूपमा स्थापित गर्ने प्रतिबद्धता व्यक्त गरेका छन्।
नाट्टाको नयाँ नेतृत्व चयनका लागि निर्वाचन साउन २९ गते काठमाडौंस्थित सोल्टी होटल मा हुँदैछ। यसपटकको निर्वाचनलाई नेपालको पर्यटन क्षेत्रको भावी दिशा, संस्थागत सुधार र निजी क्षेत्रको नेतृत्वको दृष्टिले निकै चासोका साथ हेरिएको छ।
