काठमाण्डू, जनआस्था साप्ताहिकका सम्पादक किशोर श्रेष्ठको बन्दी प्रत्यक्षीकरणसम्बन्धी रिट निवेदनमा आज सर्वोच्च अदालतमा सुनुवाइ हुँदैछ।
उक्त निवेदनको पेसी न्यायाधीशद्वय नहकुल सुवेदी र बालकृष्ण ढकालको संयुक्त इजलासमा तोकिएको छ।
वैयक्तिक गोपनीयता हननको अभियोगमा हिरासतमा रहेका श्रेष्ठकी पत्नी सरस्वती श्रेष्ठले उनको रिहाइको माग गर्दै बिहीबार सर्वोच्च अदालतमा बन्दी प्रत्यक्षीकरणको रिट दायर गरेकी थिइन्।
यसअघि साउन २९ गते न्यायाधीश बालकृष्ण ढकालको एकल इजलासले श्रेष्ठलाई बरामद गरिएका सामानसहित भदौ १ गते अदालतमा उपस्थित गराउन आदेश दिएको थियो।
अदालतले श्रेष्ठविरुद्ध परेको जाहेरीसहित अनुसन्धानको फाइल तथा उनको घर र कार्यालयबाट बरामद गरिएको सीपीयू, ल्यापटप, आइप्याड र मोबाइलसमेत इजलाससमक्ष पेस गर्न आदेश दिएको थियो।
एकल इजलासले विपक्षीलाई निवेदकको मागबमोजिम आदेश जारी हुनुपर्ने वा नपर्ने आधार र कारणसहित महान्यायाधिवक्ताको कार्यालयमार्फत लिखित जवाफ पेस गर्नसमेत भनेको थियो।
आजको संयुक्त इजलासमा हुने सुनुवाइपछि श्रेष्ठको हिरासतसम्बन्धी विषयमा अदालतले दिने आदेशलाई चासोका साथ हेरिएको छ।
