अविरल वर्षासँगै विभिन्न स्थानमा पहिरो खस्दा जिल्ला बाजुराकाे सदरमुकाम जोड्ने साँफे-मार्तडी सडक खण्ड अवरुद्ध भएको छ । गए राति लगातार परेको वर्षाका कारण मार्तडीस्थित बडी मालिका नगरपालिका-९, स्थित कारागार मोड, विनोद स्मृति प्रतीक्षालय, सेलागाड, सुवाकाँधलगायत स्थानमा सडक माथिबाट पहिरो खसेपछि सडक अवरुद्ध भएको हो ।
बडी मालिका नगरपालिका-८, को राप्का र वडा नं ६ को जडांगालगायत स्थानमा पनि पहिरो खसेर सडक अवरुद्ध भएको जिल्ला प्रहरी कार्यालयका प्रहरी निरीक्षक गगनसिंह भाटले जानकारी दिएका छन् ।
पहिराेले सडक अवरुद्ध भएको जानकारी प्राप्त भए लगत्तै जिल्ला प्रहरी कार्यालयबाट प्रहरी सहायक निरीक्षक लक्ष्मी दत्त भट्टको कमान्डमा पाँच जनाको प्रहरी टोली घटनास्थलतर्फ खटाइएको बताइएकाे छ ।
प्रहरी टोलीले बडी मालिका नगरपालिका र सडक विभागको जेसिबीको प्रयोग गरी पहिरो पन्छाएर सडक सञ्चालनमा ल्याउने पहल गरिरहेको जिल्ला प्रहरी कार्यालयले जनाएको छ ।
अहिले पनि लगातार वर्षा भइरहेकाले सडकका अन्य स्थानमा पनि पहिरो खस्ने जोखिम रहेको र पहिरोका कारण सडक अवरुद्ध भएपछि साँफे–मार्तडी सडक खण्डमा आवतजावत प्रभावित भएको छ भने गन्तव्य स्थानतर्फ जाने सवारीसाधनहरू बाटोमा नै रोकिएकाे प्रहरीले जनाएको छ ।
