काठमाडौं । देशमा पछिल्लो समय देखिएको प्राकृतिक विपद् तथा त्यसबाट प्रभावित नागरिकको राहत, उद्धार र पुनःस्थापनामा सहयोग पुर्याउने उद्देश्यले पर्वतारोहण सञ्चालक संघ नेपालले प्रधानमन्त्री राहत कोषमा ३८ लाख रुपैयाँभन्दा बढी आर्थिक सहयोग गरेको छ।
संघले विपद्का कारण प्रभावित भएका नागरिकको उद्धार तथा राहत कार्यमा सरकारलाई सहयोग पुगोस् भन्ने उद्देश्यले उक्त रकम प्रधानमन्त्री राहत कोषमा उपलब्ध गराएको हो।
नेपालको पर्यटन क्षेत्रसँग प्रत्यक्ष रूपमा जोडिएको पर्वतारोहण व्यवसायीहरूको संस्थाका रूपमा संघले विपद्को समयमा आफ्नो सामाजिक उत्तरदायित्वअन्तर्गत सहयोग गरेको जनाएको छ। प्राकृतिक विपद्का कारण ठूलो जनधनको क्षति भइरहेका बेला राहत तथा उद्धार कार्यमा निजी क्षेत्र, व्यवसायी तथा विभिन्न संघसंस्थाको सहयोग महत्वपूर्ण हुने संघको धारणा छ।
पर्वतारोहण तथा पर्यटन व्यवसाय नेपालको अर्थतन्त्रको महत्वपूर्ण आधारका रूपमा रहेको छ। पर्यटन क्षेत्रसँग सम्बन्धित व्यवसायी तथा संस्थाहरूले विपद्को समयमा सामाजिक उत्तरदायित्व निर्वाह गर्दै प्रभावित नागरिकलाई सहयोग गर्दै आएका छन्।
संघबाट उपलब्ध गराइएको आर्थिक सहयोग प्रधानमन्त्री राहत कोषमार्फत प्रभावित क्षेत्र र पीडित नागरिकको राहत तथा पुनःस्थापनाका लागि उपयोग हुने अपेक्षा गरिएको छ।संघले आगामी दिनमा पनि आवश्यकता र परिस्थितिअनुसार सामाजिक तथा मानवीय सेवाका कार्यमा सहयोग र सहकार्यलाई निरन्तरता दिने प्रतिबद्धता जनाएको छ।
विपद्को समयमा गरिएको यस प्रकारको सहयोगले प्रभावित नागरिकको राहत तथा पुनःस्थापनामा थप सहयोग पुग्ने विश्वास गरिएको छ।
