ग्यासकाे कालाेबजारी गरेकाे अभियाेगमा दुई जनालाई पक्राउ गरिएकाे छ । प्रहरीले भक्तपुर नगरपालिका–२, इटाछेबाट १४ वटा सगर ग्यास सिलिन्डरसहित ४१ वर्षीय राजेश कर्मचार्य र सूर्यविनायक नगरपालिका–३, ब्रह्मनगरस्थित सर्लाही जनरल स्टोरका सञ्चालक २५ वर्षीय उमेश साहलाई पक्राउ गरेको हाे ।
सर्लाहीको बरहथवा नगरपालिका–७ का साहले प्रतिसिलिन्डर २ हजार ८ सयमा बिक्री गर्दै आएको सूचना पाएपछि उनलाई पक्राउ गरिएको थियाे । निजको पसलबाट ७५ वटा हिमाल ग्यासका सिलिन्डर जफत गरिएको छ । जिल्ला प्रहरीले ग्यास कालोबजारी गरेको अभियोगमा उनिहरुलाई पक्राउ गरेको हाे ।
त्यसैगरि जिल्ला प्रशासन कार्यालयले मध्यपुर थिमिस्थित मध्यपुर ब्याङ्क्वेटमा राखिएका ६० वटा ग्यास सिलिन्डर सर्वसाधारणलाई वितरण गरिएको छ । प्रमुख जिल्ला अधिकारी विनोदकुमार खड्काको नेतृत्वमा बिहीबार साँझको अनुगमनमा ती सिलिन्डर सर्वसाधारणलाई वितरण गरिएको हो ।
ब्याङ्क्वेट सञ्चालकले असोजमा पार्टी प्यालेसमा धेरै भोज हुने भएकाले आफूले चितवन पुगेर बिहीबार मात्र ग्यास ल्याएको जानकारी दिँदै स्थानीय प्रशासनको अनुरोधमा आवश्यक परेकालाई ग्यास वितरण गरिएको जानकारी दिइएकाे छ ।
