मधेश स्वास्थ्य विज्ञान प्रतिष्ठानमा कार्यरत चिकित्सक डा. सरोज साहमाथि भएको सांघातिक आक्रमणप्रति नेपाल चिकित्सक संघले आपत्ति जनाएको छ । संघले आज विज्ञप्ति जारी गर्दै दोषीमाथि कारबाहीको माग गरेको हो ।
संघका अनुसार डा. साहमाथि हिजो ड्युटीमा रहेका बेला बिरामीका आफन्तको समूहले आक्रमण गरेका थिए । चिकित्सकमाथि हुने यस्ता आपराधिक घटनाले स्वास्थ्यकर्मीको पेशागत सुरक्षा तथा आत्मसम्मानमा गम्भीर असर पारेको भन्दै संघले घटनाको घोर भत्र्सना गरेको छ ।
घटनामा संलग्न दोषीलाई तत्काल कानूनी दायरामा ल्याई स्वास्थ्यकर्मी तथा स्वास्थ्य संस्थाको सुरक्षासम्बन्धी ऐन, २०६६ (पहिलो संशोधन, २०७९) बमोजिम कडा कारबाही गर्न संघको माग छ ।
‘समग्र स्वास्थ्य क्षेत्रलाई आतंकित पार्नेगरी घटाइएको यस्तो अमानवीय घटनामा संलग्न दोषीहरुलाई अविलम्ब कानूनको दायरामा ल्याई स्वास्थ्यकर्मी तथा स्वास्थ्य संस्थाको सुरक्षासम्बन्धी ऐन, २०६६ (पहिलो संशोधन, २०७९) बमोजिम कडा कारबाही गर्न संघ सम्बन्धित निकायसँग जोडदार माग गर्दछ,’ विज्ञप्तिमा भनिएको छ ।
