वैदेशिक रोजगार विभागले वैदेशिक रोजगारीमा पठाएका नेपाली श्रमिकको अवस्थाबारे विवरण बुझाउन म्यानपावर कम्पनीहरुलाई निर्देशन दिएको छ । यही असोज २१ गतेभित्र त्यस्तो विवरण विभागमा उपलब्ध गराउन निर्देशन दिइएको छ ।
विभागले गत असारमा इजाजतपत्र प्राप्त संस्थाले प्रत्येक तीन–तीन महिनामा आफूले वैदेशिक रोजगारीमा पठाएका नेपाली श्रमिकको अवस्थासम्बन्धी प्रगति विवरण बुझाउन निर्देशन दिएको थियो । सोहीबमोजिम विभागले श्रमिकको हकहित र सुरक्षा ध्यानमा राख्दै विवरण उपलब्ध गराउन भनेको छ ।
विभागका अनुसार वैदेशिक रोजगारीमा गएका प्रत्येक श्रमिक सुरक्षित रुपमा सम्बन्धित गन्तव्य मुलुकमा पुगे वा नपुगेको विवरण १५ दिनभित्र प्राप्त गर्नुपर्नेछ । त्यसका लागि म्यानपावर कम्पनीले श्रमिकसँग सम्पर्क गरी विवरण संलकन गर्नुपर्नेछ ।
त्यस्तै, श्रमिकले वैदेशिक रोजगार सम्झौताबमोजिमको काम, तलब तथा अन्य सेवासुविधा पाए–नपाएको विषयमा पनि प्रत्यक्ष सम्पर्क गरी विवरण तयार गर्न विभागको निर्देशन छ । श्रमिकको संकलित अवस्था तथा विवरण इजाजतपत्र प्राप्त संस्थाले श्रमिक उडान भएको २० दिनभित्र विभागको संस्था अनुगमन शाखामा इमेलमार्फत पेश गर्नुपर्नेछ ।
विभागले उक्त निर्देशन पालना नगर्ने वा श्रमिकको अवस्थाबारे सूचना अद्यावधिक नगर्ने म्यानपावरमाथि वैदेशिक रोजगार ऐन, २०६४ बमोजिम कारबाही हुने चेतावनीसमेत दिएको छ ।
