गत भदाै १० गते रसुवामा आएको बाढीमा परेका ५ हजार ८ सय बढि नागरिक अझै बेपत्ता रहेका छन् । उक्त विनाशकारी बाढीमा परेका ५ हजार ८७५ जना बेपत्ता रहेको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ ।
उक्त विनाशकारी बाढीबाट प्रभावित विभिन्न क्षेत्रमा भएको विपद्का कारण हालसम्म १ हजार ४११ जनाको मृत्यु भएको पुष्टि भएको छ । प्राधिकरण (एनडीआरआरएमए)ले शनिबार साँझ ७ बजेसम्मको अद्यावधिक विवरण सार्वजनिक गर्दै बाढीबाट भएको मानवीय क्षति तथा उद्धारको पछिल्लो तथ्यांक सार्वजनिक गरेको हो ।
प्राधिकरणकाे पछिल्लाे तथ्यांक अनुसार फेला परेका मृतकमध्ये ५४९ जना पुरुष र ३३६ जना महिला रहेका छन् भने ५२६ वटा आंशिक मानव अंगसमेत फेला परेको विवरणमा उल्लेख गरिएकाे छ । बाढी तथा पहिरोबाट सबैभन्दा ठूलो मानवीय क्षति चितवनमा भएको छ । विवरणअनुसार चितवनमा मात्रै ३६४ जनाको मृत्यु भएको पुष्टि भएको छ ।
विनाशकारी बाढीबाट नवलपरासी पूर्वमा २३२, नवलपरासी पश्चिममा २२२, नुवाकोटमा २०३, रसुवामा १९९, गोरखामा ७२, धादिङमा ७२ तथा तनहुँमा ३८ जनाको मृत्यु भएको प्राधिकरणले पुष्टि गरेकाे छ ।
विपद्पछि जारी खोजी तथा उद्धार अभियानअन्तर्गत हालसम्म १३ हजार ७८४ जनाको सकुशल उद्धार गरिएको प्राधिकरणले जनाएको छ । प्रभावित क्षेत्रमा नेपाली सेना, सशस्त्र प्रहरी बल, नेपाल प्रहरीलगायत सुरक्षा निकाय परिचालन गरी खोजी तथा उद्धार कार्यलाई निरन्तरता दिइएको बताइएकाे छ ।
उद्धार तथा राहत कार्यमा नेपाली सेनाले हालसम्म १ हजार ६९२ वटा हवाई उडान गरेको छ भने सशस्त्र प्रहरी बलले ३२० वटा हवाई उडानमार्फत उद्धार तथा राहतसम्बन्धी कार्यमा सहयोग गरेको छ । बाढीपछि प्रभावित जिल्लामा बेपत्ताको खोजी, मृतकको पहिचान तथा उद्धार कार्यलाई प्राथमिकताका साथ अघि बढाइएको छ र प्राधिकरणले संकलित विवरणलाई अद्यावधिक गर्दै जाने जनाएको छ ।
