गोरखामा चन्दा असुली गर्दै गरेको अवस्थामा दुई जना पक्राउ परेका छन् । पालुङटार नगरपालिका–७, च्याङ्ली बस्ने ३८ वर्षीय अमृत सापकोटा र मोरङको मिक्लाजुङ गाउँपालिका–९, का ३८ वर्षीय राजकुमार माझी समातिएका हुन् ।
प्रहरीका अनुसार उनीहरुले आज दिउँसो शहिदलखन गाउँपालिका–१, खहरेटोल बस्ने रामलक्ष्मण सामुदायिक वनका सचिव रामबहादुर भुजेललाई आफूहरु नेपाल कम्युनिष्ट पार्टी (माओवादी) को कार्यकर्ता भएको बताउँदै ज्यान लिनेसम्मको धम्की दिँदै चन्दा मागेको सूचना प्राप्त भएको थियो ।
त्यसपश्चात् जिल्ला प्रहरी कार्यालयका सहायक निरीक्षक (असई) ईश्वर बाचेमगरको कमाण्डमा खटिएको टोलीले चन्दा असुली गर्दै गरेको अवस्थामा उनीहरुलाई नियन्त्रणमा लिएको हो । उनीहरुको साथबाट २० हजार नगद, माओवादीको एउटा स्ट्याम्प छाप, रसिद प्याड दुई थान र ५० थान पर्चा बरामद गरिएको प्रहरीले जनाएको छ ।
