पछिल्लो २४ घण्टामा सवारी नियम उल्लंघन गर्ने ९७५ सवारी चालक कारबाहीमा परेका छन् । काठमाडौं उपत्यकाकाे विभिन्न स्थानमा गरिएकाे विशेष जाँचका क्रममा उनीहरूलाई कारबाही गरिएको हो ।
काठमाडौं उपत्यका ट्राफिक प्रहरी महाशाखाले विभिन्न स्थानमा सञ्चालन गरेको नियमित तथा विशेष जाँचका क्रममा उनीहरूलाई कारबाही गरिएको बताइएकाे छ । कारबाहीमा पर्नेहरूमा तीव्र गतिमा सवारी चलाउने १ सय ३० जना र मादक पदार्थ सेवन (मापसे) गरी सवारी चलाउने ४८ जना रहेका छन् ।
त्यसैगरि सिसिटिभी फुटेजका आधारमा ६१ जना, रातो बत्तीको इसारा उल्लंघन गर्ने ५१ जना र लेन अनुशासन पालना नगर्ने ४७ जना चालक कारबाहीमा परेकाे ट्राफिक प्रहरीले जनाएकाे छ ।
त्यसैगरी, सवारीसाधनको यान्त्रिक अवस्था ठिक नभएका ५५, हर्न निषेधित क्षेत्रमा हर्न बजाउने २१, एकतर्फी (वान-वे) सडकमा सवारी चलाउने १४ र अन्य विभिन्न ट्राफिक नियम उल्लंघन गर्ने ५ सय ४८ जना चालकलाई कारबाही गरिएको थियाे ।
उपत्यकाका विभिन्न नाका तथा भित्री सडकहरूमा ट्राफिक प्रहरीले सडक दुर्घटना न्यूनीकरण तथा सवारी आवागमनलाई व्यवस्थित बनाउन कडाइका साथ चेक जाँच गर्दै आएको छ ।
