आजदेखि फ्लाई दुबईले पोखरा अन्तरराष्ट्रिय विमानस्थलमा नियमित उडान सुरु गर्दैछ । फ्लाई दुबईले आजदेखि दुबई–पोखरा–दुबई रुटमा नियमित उडान सुरु गर्ने भएकाे हाे ।
नियमित अन्तरराष्ट्रिय उडानका लागि आवश्यक सम्पूर्ण तयारी तथा पूर्वाधार व्यवस्थापनको काम पूरा भएको विमानस्थलका महाप्रबन्धक जगन्नाथ निरौलाले जनाएका छन् । निराैलाका अनुसार फ्लाई दुबईको विमान आज साँझ सवा ६ बजे पोखरा अवतरण गर्नेछ भने यात्रु लिएर साँझ सवा ७ बजे दुबईका लागि प्रस्थान गर्नेछ ।
विमानलाई पोखरा विमानस्थलमा पानीको फोहराले स्वागत गरिनेछ भने फ्लाई दुबईको विमानबाट पोखरा आउने र पाेखराबाट दुबई प्रस्थान गर्ने यात्रु तथा पर्यटकलाई पोखराका पर्यटन तथा व्यवसायीले खादा मालाले स्वागत तथा बिदाइ गर्ने तयारी गरेका गरेकाे पनि निराैलाले जानकारी गराएका छन् ।
यसअघि वि.सं २०७९ पुस १७ गते अङ्ग्रेजी नयाँ वर्षको दिनदेखि सञ्चालनमा आएको विमानस्थलमा नियमित अन्तरराष्ट्रिय उडान हुन नसकिरहेका बेला फ्लाई दुबईले नियमित उडान सुरु गर्न लागेपछि यहाँका पर्यटन व्यवसायी, उद्योगी तथा सर्वसाधारण उत्साहित भएका छन् ।
