नेपालमा बंगालको खाडीमा विकसित गहिरो न्यूनचापीय प्रणालीको प्रभावका कारण आजदेखि वर्षा सुरु भएको छ । जलवाष्पयुक्त हावा नेपालतर्फ भित्रिएसँगै देशका विभिन्न क्षेत्रमा वर्षा सुरु भएकाे हो ।
उक्त मौसमी प्रणालीको प्रभावले शुक्रवारदेखि आइतबारसम्म भारी वर्षाको सम्भावना रहेको मौसम विज्ञान विभागका मौसमविद् डेविड ढकालले जनाएका छन् । आज कोशी, वागमती र गण्डकी प्रदेशका हिमाली तथा पहाडी भू–भागका धेरै स्थानमा ठूलो वर्षाको सम्भावना रहेको पनि विभागले जनाएको छ ।
भाेलि शुक्रवार र पर्सि शनिवार वर्षाको मात्रा अझ बढ्नसक्ने र भारी वर्षाका कारण कमजोर भू–भागमा पहिरो तथा नदी–खोलामा पानीको बहाव बढेर बाढीको जोखिमसमेत हुनसक्ने भएकाले सतर्कता अपनाउन आग्रह गरिएको छ ।
त्यसैगरि उच्च पहाडी तथा हिमाली क्षेत्रमा भारी हिमपातको सम्भावना रहेकाले पर्वतारोहणलगायतका गतिविधिमा समेत असर पर्नसक्ने विभागले जनाएको छ । धानबाली भित्र्याउने समय रहेकाले किसानलाई मौसमको अवस्था हेरेर तथा विज्ञको सल्लाहअनुसार कृषि कार्य अघि बढाउन मौसमविद् ढकालले आग्रह गरेका छन् ।
जल तथा मौसम विज्ञान विभागले शून्यदेखि १० मिलिमिटरसम्मको वर्षालाई हल्का, १० देखि ५० मिलिमिटरसम्मलाई मध्यम, ५० देखि १०० मिलिमिटरसम्मलाई भारी तथा १०० देखि २०० मिलिमिटरसम्मको वर्षालाई धेरै भारी वर्षाका रूपमा वर्गीकरण गरेको छ ।
