हिजाेदेखि परेकाे अविरल वर्षापछि बाढी र पहिरोका कारण बीपी राजमार्ग अवरुद्ध हुँदा सवारीसाधनहरू धुलिखेलमा ‘होल्ड’ गरिएको छ । अविरल वर्षाका कारण बीपी राजमार्गको विभिन्न स्थानमा पहिरो र लेदो खस्नुका साथै रोशीले विभिन्न स्थानमा सडक कटानगरेपछि राजमार्ग अवरुद्ध भएकाे हाे ।
उक्त राजमार्ग अवरुद्ध भएपछि काठमाडौंबाट धुलिखेल हुँदै पूर्वतर्फ जाने सवारीसाधनलाई धुलिखेलमा होल्ड गरिएको जिल्ला प्रहरी प्रमुख एसपी रविन कार्कीले जनाएका छन् ।
एसपी कार्कीका अनुसार बीपी राजमार्गको नमोबुद्ध–६, को चौकीडाँडा, रोशी–७, को चारसयवेशी, रोशी–८, को गिम्दीवेशी र रोशी-११, माम्तीमा पहिरो खसेकाले बताइएको छ ।
उक्त राजमार्गका चौकीडाँडामा रोशी खालाले डाइभर्सन कटान गरेको छ । अहिले पनि वर्षा भइरहेकाले पहिरो हटाउन समय लाग्ने भएकोले यात्रुहरूलाई सडकको अवस्थाबारे जानकारी लिएर मात्र यात्रा गर्न प्रहरीले अनुरोध गरेको छ ।
त्यस्तै राजमार्गको काभ्रेभञ्ज्याङ र भकुण्डेमा समेत सवारी होल्ड गरिएको प्रहरीले जनाएको छ ।
