पर्वतमा कालीगण्डकी नदीको बहाव बढेर बस्तीमा पस्दा २५ घर बगाएकाे छ । पर्वतको जलजला गाउँपालिका–८, फर्सेमा नदीको बहाव बढेर बस्तीमा पसेर २५ घर बगेकाे हाे ।
नेपाल प्रहरीले दिएको जानकारीअनुसार आज बिहान करिब ८ बजे नदीको बहाव बढेर बस्तीमा पसेको थियाे । उक्त बस्तीमा करिब ८० घर रहेकाेमा २५ घर बगेका छन् भने बाँकी घरहरू पनि जोखिममा रहेका प्रहरीले जनाएको छ ।
उक्त घटनामा हालसम्म मानवीय क्षति भएको छैन भने बस्तीका सबै स्थानीयलाई सुरक्षित स्थानमा स्थानान्तरण गरिएको प्रहरीले जनाएको छ । पहिरोका कारण प्रहरी टोली तत्काल घटनास्थलमा पुग्न सकेको छैन । घटनास्थल प्रहरी चौकी मिलनचोक, पर्वतबाट करिब ६ किलोमिटर पूर्वमा पर्छ ।
घटनाको थप विवरण आउन बाँकी रहेको नेपाल प्रहरीले जनाएको छ ।
