हुम्लामा निरन्तर वर्षा र हिमपात हुँदा त्यहाँको जनजीवन प्रभावित भएको छ । वर्षा र हिमपातसँगै जिल्ला सदरमुकाम सिमकोटसहित अधिकांश क्षेत्रमा फोन तथा इन्टरनेट सेवा समेत अवरुद्ध भएको छ ।
जिल्लाका अग्ला स्थानमा रहेका टेलिफोन तथा इन्टरनेट टावरमा जडान गरिएका सोलार प्रणालीले काम नगरेपछि सञ्चार सेवा प्रभावित भएको छ । सञ्चार सेवा अवरुद्ध हुँदा स्थानीय तह, सुरक्षा निकाय तथा अन्य सम्बन्धित कार्यालयसँग समन्वय गर्न समेत समस्या भएको बताइएकाे छ ।
वर्षाका कारण जिल्लाका विभिन्न स्थानमा विद्यालय भवनमा क्षति पुग्नुका साथै सडक अवरुद्ध भएको छ भने निरन्तर वर्षासँगै सिमकोटसमा पनि हिमपात भएको छ । हिल्सा नाका हिमपातका कारण पूर्णरूपमा अवरुद्ध रहेको जनाइएको छ ।
