सुनापति गाउँपालिकाले सुनापति आधारभूत अस्पतालमा स्वास्थ्य सेवा विस्तार गरेकाे छ । पालिकाकाे एक मात्र सरकारी अस्पताल सुनापति आधारभूत अस्पतालमा स्वास्थ्य सेवा विस्तार गरेकाे हाे ।
उक्त अस्पतालमा स्वास्थ्य सेवा विस्तारसँगै सेवाग्राहीको सङ्ख्या बढ्दै गएको बताइएकाे छ । अस्पतालमा आकस्मिक, दन्त, आँखा, प्रयोगशाला तथा प्रसूति सेवासहित विभिन्न स्वास्थ्य सेवा उपलब्ध हुन थालेपछि स्थानीयवासीहरु उपचारका लागि काठमाडौं जानुपर्ने बाध्यताबाट छुटकारा पाएका छन् ।
अस्पतालका प्रमुख तथा मेडिकल अधिकृत डा. नागेश्वर चौधरीका अनुसार हाल अस्पतालमा दैनिक औसत ५० देखि ६० जना सेवाग्राही आउने गरेकाे बताएका छन् । बिदापछि अस्पताल खुल्ने दिनमा सेवाग्राहीको सङ्ख्या करिब एक सयसम्म पुग्ने गरेको उनकाे भनाइ रहेकाे छ ।
डा. चौधरी भन्छन, “स्वास्थ्य चौकी हुँदा सेवाग्राहीको सङ्ख्या कम थियो । अस्पताल स्थापना भएपछि सेवा विस्तार भएका कारण स्थानीयवासी उपचारका लागि काठमाडौं जानुभन्दा आफ्नै अस्पतालमा आउने क्रम बढेको छ।”
गाउँपालिकाले पाँचवटै वडाका नागरिकलाई स्थानीयस्तरमै आधारभूत स्वास्थ्य सेवा उपलब्ध गराउने उद्देश्यले अस्पताल सञ्चालनमा ल्याइएको हो । भौगोलिक विकटता, वर्षायाममा सडक अवरुद्ध हुने अवस्था तथा उपचारका लागि काठमाडौंसम्म पुग्नुपर्ने बाध्यतालाई ध्यानमा राखेर अस्पतालले स्थानीय स्वास्थ्य सेवाको पहुँच विस्तार गरिरहेको छ ।
