झापाको बिर्तामोडमा मध्यराति डेरामा पसेर हातखुट्टा र घाँटी बाँधी युवतीमाथि आगो लगाउने एक भारतीय नागरिक पक्राउ परेका छन् । भारतको किशनगञ्जका ४२ वर्षीय दिलिपचन्द्र राय समातिएका हुन् । उनी बिर्तामोड नगरपालिका–५, इलाम स्टेनस्थित अमृत भोग मिठाई पसलमा काम गर्दै आएका थिए ।
प्रहरीका अनुसार राय सोमबार राति साढे १० बजे मदिरा सेवन गरी पेट्रोल बोकेर बिर्तामोड–५ मा डेरामा बस्दै आएकी २२ वर्षीया रविना मगरको कोठामा पुगेका थिए । त्यसपछि उनले तन्ना च्यातेर रविनाको हातखुट्टा र घाँटी बाँधेको र शरीरमा पेट्रोल छर्की आगो लगाएको प्रहरीले जनाएको छ ।
घटनालगत्तै रायलाई नियन्त्रणमा लिइएको र घाइते रविनाको मनमोहन अस्पतालमा उपचार भइरहेको प्रहरीले जनाएको छ । साथै, घटनाबारे थप अनुसन्धान भइरहेको प्रहरीको भनाइ छ ।
