नापी कार्यालय कलंकी, काठमाडौंका सर्भेक्षक सुविन्द्र श्रेष्ठउपर भ्रष्टाचार मुद्दा दायर भएको छ । गैरकानूनी रुपमा अकुत सम्पत्ति जोडेको आरोपमा अख्तियार दुरुपयोग अनुसन्धान आयोगले उनीविरुद्ध भ्रष्टाचार मुद्दा दर्ता गरेको हो । श्रेष्ठ २०५३ साउन २७ गते निजामती सेवामा प्रवेश गरेका थिए ।
उनीविरुद्ध उजुरी परेपछि अख्तियारले ०८१ चैत २९ गतेसम्मको सम्पत्ति जाँच गरेको थियो । त्यसक्रममा श्रेष्ठ तथा उनका परिवारका सदस्यहरूले सार्वजनिक सेवाबाट प्राप्त तलब तथा भत्ता, जग्गा बिक्री, घरजग्गा बहाल, सवारीसाधन बिक्री, बीमा, ऋण–सापटी तथा बैंक खातामा प्राप्त विभिन्न रकमलगायतका स्रोतबाट कूल ७ करोड ७५ लाख ७८ हजार ८ सय ४० रुपैयाँ ८७ पैसा वैधानिक आय आर्जन पाइएको अख्तियारले जनाएको छ ।
तर, सोही अवधिमा जग्गा खरिद, घर निर्माण, शेयर खरिद, सवारीसाधन खरिद, छोरीहरूको अध्ययन खर्च, कर्मचारी सञ्चयकोष तथा व्यक्तिगत ऋण–सापटी भुक्तानी र बैंक मौज्दातसमेत गरी कूल १२ करोड ५० लाख २५ हजार ६ सय ५४ रुपैयाँ ३६ पैसा खर्च तथा लगानी गरेको देखिएको हो । यसरी कुल वैधानिक आयभन्दा ४ करोड ७४ लाख ४६ हजार ८१३ रुपैयाँ स्रोत पुष्टि हुन नसकेको अख्तियारको दाबी छ ।
अख्तियारका अनुसार उनले गैरकानूनी रुपमा आर्जित रकमबाट घरजग्गा, गाडी, सेयर किनी श्रीमती कमलाको नाममा समेत राखेको पाइएको छ । अख्तियारले भ्रष्टाचार निवारण ऐन, २०५९ र २०१७ बमोजिम कमलालाई समेत प्रतिवादी कायम गर्दै उक्त सम्पत्ति जफत गरी सर्भेक्षक सुविन्द्रलाई कैद र जरिवाना सजाय हुन मागदाबी गरेको छ ।
