शिक्षा तथा खेलकुद मन्त्रालयले राजनैतिक दलको कार्यक्रममा सहभागी शिक्षकहरुको खोजबिन गर्न निर्देशन दिएको छ ।
केही जिल्लाका सामुदायिक विद्यालयमा कार्यरत शिक्षकहरु दलको कार्यक्रममा सहभागी भएको समाचारप्रति ध्यानाकर्षण जनाउँदै मन्त्रालयले यस्तो निर्देशन दिएको हो ।
मन्त्रालयले ७७ वटै शिक्षा विकास तथा समन्वय एकाईलाई परिपत्र गर्दै शिक्षकका त्यस्ता कार्यप्रति थप खोजबिन, निगरानी गर्दै कारबाहीका निम्ति निर्देश गरेको छ ।
भनिएको छ, ‘शिक्षकका उक्त गतिविधिहरु शिक्षा नियमावली, २०५९ को नियम १३३ को उपनियम (१) खण्ड (ग) को कानूनी प्रावधानविपरीत हुनजाने सन्दर्भमा शिक्षकका त्यस्ता कार्यप्रति थप खोजबिन गर्ने, निगरानी गर्ने र स्थानीय तहसँगको समन्वयमा त्यस्तो आचारसंहिता उल्लंघन गर्ने शिक्षकहरुलाई सोही नियमावलीको नियम १३७ को खण्ड (ग) तथा नियम १४३ बमोजिम कारबाहीको व्यवस्थाका लागि यो निर्देशन गरिएको छ ।’
