गोरखाको प्रसिद्ध मनकामना मन्दिरमा आवतजावतका लागि सञ्चालित मनकामना केबलकार आज एक दिन बन्द गरिएकाे छ । चितवनको कुरिनटारदेखि गोरखाको प्रसिद्ध मनकामना मन्दिरसम्म जानका लागि सञ्चालित मनकामना केबलकार एक दिन बन्द हुने भएको हाे ।
चाडपर्वअघि नियमित मर्मतसम्भार गर्नुपर्ने भएकाले केबलकार सेवा एक दिनका लागि बन्द गर्न लागिएको मनकामना दर्शन प्रालिका नायब महाप्रबन्धक उज्ज्वल शेरचनले जानकारी दिएका छन् । उनका अनुसार टावर तथा स्टेसनको नियमित मर्मतसम्भार गर्नुपर्ने भएकाले सेवा बन्द गरिएको बताइएकाे छ ।
महाप्रबन्धक शेरचनले भने “टावर र स्टेसनको काम मर्मत गर्नुपर्ने भएकाले एक दिन सेवा बन्द गर्न लागिएको हो ।” उनका अनुसार असाेज २१ गते बुधबारदेखि केबलकार सेवा नियमित सञ्चालनमा आउने बताइएकाे छ ।
केबलकार बन्द गरी टावरको मर्मत तथा निरीक्षण गर्नुका साथै दुवै स्टेसनको अवस्थाबारे जाँच गरिने बताउँदै उनले सेवा बन्द रहने जानकारी सामाजिक सञ्जालमार्फत समेत गरिएकाे बताएका छन् । उक्त केबलकार सेवा बन्दबाट पर्न जाने असुविधाप्रति मनकामना दर्शन प्रालिले क्षमा मागेको छ ।
