गएराति कैलालीको धनगढी उपमहानगरपालिका–१७, धुर्जन्नामा चट्याङको झिल्का लागेर सात जना घाइते भएका छन् । राति स्थानीय खुशिलाल चौधरीको घरको छतमा जन्मदिन मनाइरहेका बेला घर नजिकै चट्याङ पर्दा त्यसको झिल्का लागेर सात जना घाइते भएका हुन् ।
जिल्ला प्रहरी कार्यालयका अनुसार चट्याङको झिल्का लागेर ३५ वर्षीया आरती चौधरी, १७ वर्षीया आयुसरा चौधरी, १३ वर्षीया श्रृष्टी चौधरी, ५५ वर्षीया बाग्मती चौधरी, सात वर्षीय सिसिर चौधरी, १४ वर्षीया रेनुका चौधरी र ३५ वर्षीया जानकी चौधरी घाइते भएकाे बताइएकाे छ ।
घाइते सबैलाई राति नै उपचारका लागि सेती प्रादेशिक अस्पताल धनगढी लगिएको प्रहरीले जनाएकाे छ । अस्पतालमा उपचाररत सबैको अवस्था सामान्य रहेको पनि जिल्ला प्रहरी कार्यालय कैलालीका सूचना अधिकारी प्रहरी नायब उपरीक्षक योगेन्द्र तिमिल्सिनाले जानकारी दिएका छन् ।
