काभ्रेपलाञ्चोकको चौरीदेउराली गाउँपालिका–३, का स्थानीय युवा नेता उस्पार सुनारले नेपाली कांग्रेसको १५ औँ महाधिवेशनमा केन्द्रीय सदस्य पदमा उम्मेदवारी दिएका छन् ।
उनले खुला युवा समूहअन्तर्गत केन्द्रीय सदस्य पदमा उम्मेदवारी दिएका हुन् । सुनार महाधिवेशनमा कान्छा केन्द्रीय सदस्य उम्मेदवारमध्ये एक हुन् ।
राजनीतिमा युवाको सक्रिय सहभागिता र नेतृत्व विकासलाई प्राथमिकतामा राख्दै यो उम्मेदवारी दिएको सुनारले बताएका छन् । उनको उम्मेदवारीले काभ्रेबाट कांग्रेसको केन्द्रीय नेतृत्वमा युवाको प्रतिनिधित्वका लागि नयाँ सम्भावना देखाएको समर्थकहरुको भनाइ छ ।
उनको प्रचारमा ‘युवा नेतृत्व, समृद्ध देशको आधार’ भन्ने नारा अघि सारिएको छ । चौरीदेउराली–३, मा स्थानीयस्तरमा राजनीतिक तथा सामाजिक गतिविधिमा सक्रिय रहँदै आएका सुनारले युवालाई पार्टीको नीति, नेतृत्व र निर्णय प्रक्रियामा थप प्रभावकारी रुपमा सहभागी गराउनुपर्नेमा जोड दिएका छन् ।
उनको उम्मेदवारीले काभ्रेका युवा कांग्रेस कार्यकर्तामाझ पनि चासो बढाएको छ । विशेषगरी नयाँ पुस्तालाई पार्टी नेतृत्वमा स्थान दिनुपर्ने बहस भइरहेका बेला सुनारको केन्द्रीय सदस्य पदको उम्मेदवारीलाई अर्थपूर्ण रुपमा हेरिएको छ ।
