काठमाण्डू, सत्ता गठबन्धन दलहरूबीच भूमिसम्बन्धी अध्यादेश फिर्ता लिएर विधेयकका रूपमा ल्याउने सहमति भएको छ ।
बुधबार बालुवाटारमा प्रधानमन्त्री केपी शर्मा ओलीसहित सत्ता गठबन्धनमा रहेका दलका शीर्ष नेताहरूबीच भूमि अध्यादेश फिर्ता गरेर विधेयक ल्याउने सहमति भएको हो ।
बैठकमा भूमिसम्बन्धी अध्यादेश विधेयकका रूपमा अघि बढाउने निर्णय गरेको नेपाली कांग्रेसका प्रमुख सचेतक श्याम घिमिरेले जानकारी दिए ।
उनले भने,‘भूमिसम्बन्धी अध्यादेशमा हाम्रो अब्जेक्सन कायम छ । त्यही भएर आजको बैठकमा यो अध्यादेशलाई आफैँ निष्क्रिय हुन दिने र नियमित विधेयकका रूपमा ल्याउने सहमति बनेको छ ।
अरू विषयमा केही पनि कुरा भएको छैन् । आजको बैठकमा भूमिसम्बन्धी अध्यादेशलाई अब के गर्ने र १८ गतेबाट आफैँ निष्क्रिय हुन्छ, या त सरकारले फिर्ता लिनुपर्यो, या त यो आफैँ निष्क्रिय हुने अवस्थामा पुगेको छ ।
त्यसैले यसै विषयमा आजको बैठकले अघि बढाउने निर्णय गरेको हो।’
सरकारले भूमिसहित ६ वटा अध्यादेश ल्याएकोमा अन्य ५ वटा अध्यादेश प्रतिनिधि र राष्ट्रियसभाबाट पारित भइसकेका छन् ।
तर, भूमि अध्यादेश भने सदनमा निर्णयार्थ पेस गरिएको थिएन ।
