काठमाण्डू, राष्ट्रिय मानवअधिकार आयोगले तीनकुने घटनामा प्रहरीले घातक हतियार प्रयोग गरेको बारे अनुसन्धान अघि बढाएको छ ।
प्रहरीको गोप्य प्रतिवेदनले प्रदर्शन दबाउनका लागि ११० राउन्ड गोली प्रहार गरेको र तीमध्ये ८१ राउन्ड गोली भीड नियन्त्रणका लागि निषेधित हतियारबाट चलाएको औँल्याएपछि आयोगले यसमा गम्भीरताका साथ अनुसन्धान अघि बढेको बताएको हो ।
मानवअधिकार आयोगका सचिव मुरारीप्रसाद खरेलले घटनामा प्रहरीको बल प्रयोगलाई आयोगले नजरअन्दाज नगरेको उल्लेख गरे ।
बल प्रयोगको सिद्धान्तबारे जानकार विज्ञ, घातक हतियारबारे जानकार विज्ञ समेतलाई राखेर आयोगले अनुसन्धान सुरु गरेको जानकारी दिए ।
‘तीनकुने घटनामा भएको बल प्रयोगलाई आयोगले नजरअन्दाज गरेको छैन । सुरक्षा विज्ञहरूलाई समेत राखेर हामीले अनुसन्धान अघि बढाइसकेका छौँ,’ उनले भने ।
सचिव खरेलले आयोगका तर्फबाट अनुसन्धानमा खटिएका विज्ञको विवरण भने उपलब्ध गराएनन् ।
हामीले निष्पक्ष अनुसन्धानका लागि विज्ञहरूको छनौट गरेका छौँ । उहाँहरूको विवरण सार्वजनिक गर्दा राजनीतिक दबाब पर्न सक्ला त्यसले निष्पक्ष अनुसन्धानमा पनि बाधा पुर्याउन सक्छ,’ उनले भने ।
तीनकुने घटनामा मानवअधिकारको अवलोकन र त्यसपछिको अनुसन्धानबारे प्रमुख आयुक्त तपबहादुर मगरसँग गरेको संक्षिप्त संवाद ।
तीनकुने घटनालाई मानवअधिकार आयोगले कसरी लिएको छ ?
तीनकुनेको प्रदर्शनको सूचना आएपछि मानवअधिकार आयोगले आन्दोलनलाई शान्तिपूर्वक बनाउन ध्यानाकर्षण गराएको थियो ।
परिस्थिति भने बेग्लै बन्यो । आन्दोलन के कति कारणले अराजक भयो किन यत्तिको जनधनको क्षति हुन पुग्यो भन्ने कुरालाई आयोगले निकै गम्भीरतापूर्वक लिएको छ ।
सार्वजनिक बहसमा आएका कुरालाई हामीले रेकर्डमा राखेका छौँ । हाम्रै टोलीहरूले पनि अवलोकन गर्नुभएको छ । घटनाको स्वतन्त्र र निष्पक्ष छानबिनको पक्षमा आयोग छ । आयोगले आफ्नो काम अघि बढाएको छ ।
यो प्रकरणमा मानवअधिकार आयोगको सुस्तताप्रति प्रश्न उठिरहेको छ नि ?
आयोग सुस्त भयो की भन्ने कोणबाट चर्चा भएको सुनिन्छ, तर वास्तविकता त्यस्तो छैन । मानवअधिकार उल्लङ्घनका घटना छानबिनका लागि हामी सधैँ क्रियाशील छौँ ।
यो घटनामा पनि हामीले अनुसन्धान अघि बढाइसक्यौँ । आयोगले छिट्टै आफ्नो निष्कर्ष बाहिर ल्याउने छ ।
यो घटनामा अत्यधिक बल प्रयोग गरेको भन्दै प्रहरी आलोचित भइरहेको छ । आयोगको अवलोकनले के देखाउँछ रु
घटनामा प्रहरीले बल प्रयोग गरेको विषय हामीले नजरअन्दाज गरेका छैनौँ । भीड नियन्त्रणका लागि घातक हतियार प्रयोग र बल प्रयोगलाई हामीले गम्भीरतापूर्वक लिएका छौँ ।
आयोगले घातक हतियारबारे जानकार विज्ञ, बल प्रयोगको सिद्धान्त र त्यसको कार्यान्वयनबारे जानकारलाई सम्मिलित गराउँदै अनुसन्धान अघि बढाइसकेको छ ।
