काठमाण्डू, चैत १५ गते तीनकुने क्षेत्रमा राजावादी आन्दोलनका क्रममा भएको हिंसात्मक प्रदर्शनपछि पक्राउ परेका राप्रपा नेताहरूसहित २० जनालाई राज्यविरुद्धको कसुरमा अनुसन्धान गर्न १५ दिन म्याद थप भएको छ ।
राप्रपाका वरिष्ठ उपाध्यक्ष रवीन्द्र मिश्र र महामन्त्री धवलशमशेर राणासहित २० जनालाई राज्यविरुद्धको कसुरमा थप १५ दिन थुनामा राख्न जिल्ला अदालत काठमाडौंले मंगलबार अनुमति दिएको हो ।
जिल्ला प्रहरी परिसर काठमाडौँका प्रवक्ता एसपी अपीलराज बोहराका अनुसार आपराधिक उपद्रवको मुद्दामा अनुसन्धान भइरहेका ५३ जनालाई भने २० दिनको म्याद थप भएको छ ।
चैत १५ गते तीनकुनेमा दुर्गा प्रसाईंको नेतृत्वमा भएको प्रदर्शनमा व्यक्ति तथा सरकारी सम्पत्तिमा आगजनी तथा तोडफोड भएको थियो ।
सो घटनापछि प्रहरीले ७३ जनालाई हिरासतमा राखेर अनुसन्धान गरिरहेको छ । घटनामा परेर दुई जनाको मृत्यु र ५० जनाभन्दा धेरै घाइते भएका थिए ।
