आज साउनको दोस्रो सोमबार, भारी वर्षामा पनि छाता ओढेर शिवालयहरूमा दर्शनार्थीहरूको भिड

काठमाण्डू, आज साउनको दोस्रो सोमबार देशभरिका शिवालयहरूमा दर्शनार्थीको भिड लागेको छ ।

गए रातिदेखि नै काठमाडौं उपत्यकासहित देशका विभिन्न स्थानमा भारी वर्षा भइरहेको भएपनि शिवालयहरूमा भिड कम भएको छैन ।

पशुपतिनाथ, भक्तपुरको डोलेश्वर मन्दिर लगायतका शिवालयहरूमा छाता ओढेर नै दर्शनार्थीहरु पुगेका छन् ।

ढोला शिखर पर्वत शृङ्खलाको काखमा रहेको डोलेश्वर महादेव, भक्तपुरको सिपाडोलमा अवस्थित प्राचीन शिवालय हो।

आज साउन महिनाको दोस्रो सोमबार झरीको प्रवाह नगरी यहाँ श्रद्धालुहरूको भीड देखिन्छ।

प्राचीनकालदेखि ‘डोलेश्वर महादेव’का नामले पुकारिँदै आएको यो स्थललाई नेपाल भाषामा ‘सिपारे माद्यो’ भनेर चिनिन्छ।

मल्लकालीन राजा भूपतीन्द्र मल्लले मन्दिर प्राङ्गणमा स्थापना गराएको शिलालेखले यस नामको ऐतिहासिक प्रमाण दिन्छ।

हिन्दू पौराणिक ग्रन्थ हिमवतखण्डमा यहाँका शिवलाई ‘विमलेश्वर महादेव’ भनेर उल्लेख गरिएको छ। पाण्डवहरूले समेत यहाँ दर्शन गरेको जनविश्वास रहिआएको छ।

डोलेश्वर महादेवलाई भारतको प्रसिद्ध तीर्थ श्री केदारनाथको शिर भाग मानेर समेत पूजा गरिन्छ।