काठमाण्डौ, चालू आर्थिक वर्ष २०७९/८० को पुस महिनामा घरजग्गा कारोबारमा वृद्धि भएको छ ।
भूमि व्यवस्था तथा अभिलेख विभागको तथ्यांक अनुसार घरजग्गा कारोबारमार्फत पुस महिनामा सरकारले ३ अर्ब ५१ करोड रुपैयाँ राजस्व संकलन गरेको हो ।
जुन गत मंसिर महिनाको तुलनामा ६५ करोड रुपैयाले धेरै हो । पुस महिनामा भएको १ लाख ३६ हजार ७७३ वटा कारोबारबाट ३ अर्ब ५१ करोड रुपैयाँ राजस्व संकलन भएको हो ।
पुसमा देशभरका मालपोत कार्यालयबाट ४५ हजार २७७ लिखत पारित भएको छ। जुन मंसिरको तुलनामा ३ हजार ४२६ ले बढी हो।
यस महिना ३ हजार ९०९ वटा नामसारी भएकोमा ३५ हजार ४३५ रोक्का र २५ हजार ७४९ फुकुवा भएको छ ।
तथ्यांकअनुसार पुसमा सबैभन्दा धेरै घरजग्गा किनबेच इनरुवा मालपोत कार्यालयबाट भएको छ।
इनरुवा मालपोत कार्यालयबाट पुसमा १ हजार ९३७ लिखत पारित भएको छ।
दोस्रोमा भद्रपुर मालपोत कार्यालयबाट १ हजार ७४३, मोरङ बेलबारीबाट १ हजार ६५०, जनकपुरबाट १ हजार ५२०, राजविराजबाट १ हजार २६०, जलेश्वरबाट १ हजार ५७, मलंगवाबाट १ हजार ४५ र तौलिहवा मालपोत कार्यालयबाट १ हजार २ लिखत पारित भएका छन्।
काठमाण्डौ उपत्यकाका जिल्लामा भक्तपुर मालपोत कार्यालयबाट सबैभन्दा धेरै लिखत पारित भएको छ। भक्तपुर मालपोत कार्यालयबाट पुस महिनामा ८७७ लिखत पारित भएको छ।
यो अवधिमा लगनखेल मालपोतले घर जग्गा कारोबारमार्फत सबैभन्दा धेरै २७ करोड ७२ लाख रुपैयाँ राजस्व संकलन गरेको छ।
