काठमाण्डू, नेपाल सद्भावना पार्टीका अध्यक्ष अनिलकुमार झाले दोहोरो चरित्र देखाउने मधेशवादी राजनीतिक दलहरुका कारण नै मधेशले सोचेको जति अधिकार प्राप्त गर्न नसकेको बताएका छन् ।
उनले मधेशवादी राजनीतिक दलहरुका मुद्दा खरो रुपमा बोक्ने राजनीतिक दलहरु कम रहेको बताएका हुन् ।
मधेशमा जय मधेश भन्ने र काठमाडौँमा सङ्घीय अभिवादन भन्ने राजनीतिक दलका नेताहरु भएकाले मधेश अधिकारहरुबाट संकुचित हुनु परेको उनको भनाइ छ ।
काठमाडौँमा आएर प्रधानमन्त्रीको पूजा गर्ने र मधेशमा गएर मधेशलाई सखाप पारे भन्ने राजनीतिक दलका नेताहरुको दोहोरो चरित्र मधेशका जनताले बुझ्नुपर्ने बताए ।
त्यसका लागि आफू आगामी निर्वाचनमा परीक्षण हुन तयार रहेको उनको भनाइ छ । आफूहरु अन्त्यतः ब्यालेटको राजनीतिमै जाने बताए ।
उनले भने, ‘मधेश र मधेसवादीका निम्ति तपाईंको स्टुडियोदेखि सिंहदरबारसम्म सिंहदरबारदेखि बानेश्वरको सांसद भवनसम्म, सांसद भवनदेखि विदेशी समुदायसम्म, विदेशी समुदायदेखि बालुवाटार प्रधानमन्त्रीको अगाडि आँखामा आँखा जुधाएर बोल्दासम्म र त्यहाँदेखि जनतासम्म एउटै कुरा बोल्ने ।
यहाँ कस्ता पार्टी पनि छन् कि मधेशमा जय मधेस पनि बोल्छन् काठमाडौँमा सङ्घीय अभिवादन भन्छन् ।
प्रधानमन्त्रीसँग के भन्छ गएर उनको खुट्टा पुज्छन् अनि मधेशमा गएर के भन्छ आँप झार्यो केपी ओलीले भन्छन् ।
त्यस्तो डबल स्ट्यान्डर, ट्रिपल स्ट्यान्डर पार्टीहरु तपाईँ देख्न सक्नुहुन्छ । तपाईँ जुन भन्नुहुन्छ टेस्टेडको कुरा मलाई लाग्दैन कि टेस्टेड हुनु कुनै खराब कुरा पनि होइन तर फेरि पनि टेस्ट दिन म तयार छु ।
फेरि टेस्ट होला । टेस्ट त प्रत्येक पाँच पाँच वर्षमा हुन्छ नि नेताको । फेरि अर्को चुनावमा होला । त्यो टेस्ट त फेरि पनि देखिन्छ । ’
निर्वाचन आउन अझै दुई वर्ष बाँकी रहेकाले यसबीचमा सद्भावना पार्टीलाई जनस्तरस्म्म पुर्याउने बताए ।
