काठमाण्डू, सरकार र आन्दोलनरत उखु किसानबिच सिंहदरबारमा वार्ता शुरु भएको छ । कृषि मन्त्री रामनाथ अधिकारी किसानसँग आफैं वार्तामा बसेका छन् ।
यसअघि कृषि तथा पशुपन्छी विकास मन्त्री अधिकारीले आजै उपमहानिर्देशक सिंहको संयोजकत्वमा ४ सदस्यीय वार्ता टोली गठन गरेका थिए।
यस अघि भएको बार्तामा मन्त्रिपरिषदको बैठकले यसपटक उखु किसानलाई प्रतिक्विन्टल ३५ रुपैयाँ अनुदान उपलब्ध गराउने निर्णय गरेपनि प्राविधिक कारण जनाउँदै अर्थ मन्त्रालयले निकासा गर्न ढिलाइ गरेको थियो।
किसान र मन्त्रालयका प्रतिनिधिवीच बार्ता हुनु अघि सरकारले ७५ करोड ४९ लाख ३८ हजार २ सय ४० रुपैयाँ निकासा गरेको थियो ।
प्रतिक्विन्टल ३५ रुपैयाँ अनुदान उपलब्ध गराउने निर्णयमा किसानले चित्त बुझाएका थिएनन् ।
निकासा गरिएको रकम जिल्लास्थित कोष तथा लेखा नियन्त्रकको कार्यलयमार्फत् किसानको बैंक खातामा पुग्ने कृषि तथा पशुपन्छी विकास मन्त्रालयको भनाइ छ।
यो रकम प्राप्त हुन नसक्दा उखु किसानले काठमाडौंकेन्द्रित आन्दोलन गर्दे आएका छन्।
यस अघि उखु किसानहरूले प्रति क्विन्टल ७० रुपैयाँ प्रोत्साहन स्वरुप पाउँदै आएका थिए।
कृषि मन्त्रालयले उखु किसानलाई यतिनै रकम उपलब्ध गराउन मन्त्रिपरिषदमा प्रस्ताव लगेको भएपनि मुलुकको आर्थिक अवस्था, आवश्यकताका आधारमा ३५ रुपैयाँ उपलब्ध गराउने निर्णय भएको मन्त्रालयको भनाइ छ।
यसैबीच काठमाडौंमा आन्दोलनरत उखु किसान र कृषि मन्त्रालयका प्रतिनिधिबीच मन्त्रालयमा वार्ता भएको छ।
वार्तामा मन्त्रालयका तर्फबाट मन्त्रीसहित कृषि विभागका उपमहानिर्देशक ललनकुमार सिंह, उपसचिव लालकुमार श्रेष्ठ र मणिरत्न अर्याल र उद्योग मन्त्रालयका प्रतिनिधि सहभागी थिए भने उखु किसानका तर्फबाट श्यामवावु रायलगायत सहभागी छन् ।
