काठमाण्डू, दुई वर्षदेखि गाजामा हमासले बन्धक बनाएको भनिएका नेपाली विद्यार्थी विपीन जोशी बोलिरहेको भिडिओ क्लिप्स सार्वजनिक गरिएको छ।
द टाइम्स अफ इजरायलले बुधबार राति २०२३ अक्टोबर ७ का दिन किबुट्ज अलुमिममा भएको आक्रमणका क्रममा हमासले विपीन अपहरण गरेको केही समयपछि खिचेको भिडिओ भन्दै सार्वजनिक गरेको हो।
इजरायलको रक्षा बलले बरामद गरी विपीनको परिवारलाई उपलब्ध गराएको भिडिओ २०२३ नोभेम्बरमा खिचिएको विश्वास गरिएको छ।
३३ सेकेन्डको भिडिओमा विपीन अंग्रेजीमा बोलिरहेका छन्।
‘मेरो नाम बिपीन जोशी हो। म नेपालबाट हुँ। म २३ वर्षको भएँ। म २५ दिनअघि इजरायल आएको थिएँ।
म यहाँ सिक्नुहोस् र कमाउनुहोस् कार्यक्रमका लागि आएको थिएँ, म एक विद्यार्थी हुँ’, उनी भनिरहेका छन्, ‘म सिट्रस र कागती फार्ममा कृषि फार्ममा काम गर्छु।’
यो भिडिओसँगै उनी जीवित रहेको आशा पलाएको छ। तर, त्यो भिडिओ २ वर्षअघिकै भएकाले विपीनको वर्तमान अवस्था अझै स्पष्ट छैन।
