काठमाण्डू, नेपाली कांग्रेसका कार्यवाहक सभापति पूर्णबहादुर खड्काले जेनजी आन्दोलन हाइज्याक गरेर भदौ २४ गते राज्य प्रणालीमाथि हमला भएको बताएका छन् ।
ग्र्यान्ड डिजाइनमार्फत कार्यपालिका, व्यवस्थापिका र न्यायपालिकामाथि हमला भएको उनको भनाइ थियो ।
सोमबार पार्टी केन्द्रीय कार्यालय सानेपामा तरुण दलको स्थापना दिवसको अवसरमा आयोजित चियापान कार्यक्रमलाई सम्बोधन गर्दै खड्काले डिजाइनमै देशलाई ४ घण्टामा ध्वस्त गरिएको बताएका हुन् ।
‘जेनजी युवाकै अगुवाको भनाइमा आन्दोलनमा घुसपैठ भएर २४ गते ४ घण्टामा ठूलो ध्वंस र क्षति भयो ।
कार्यपालिका, व्यवस्थापिका र न्यायालयमाथि अर्थात् राज्य प्रणालीमाथि ठूलो आक्रमण भयो,’ खड्काले भने, ‘राजनीतिक दलका पार्टी कार्यालय खरानी बनाइए ।
देशको राज्य प्रणालीमाथि ग्र्यान्ड डिजाइन भयो, ठूलो तयारी साथ शान्तिपूर्ण आन्दोलन हाइ ज्याक गरेर देशलाई प्रतिकूल अवस्थामा पुर्याइयो ।’
विगतमा तात्कालीन कांग्रेस सभापति स्व. गिरिजाप्रसाद कोइरालाले ‘ग्र्यान्ड डिजाइन’ भन्ने गरेका थिए ।
खड्काले कोइरालाको त्यही शब्द सापटी लिएर राज्य संयन्त्रमाथि ध्वंस भएको बताए ।
गणतन्त्र र संविधान जोगाउन राष्ट्रपति रामचन्द्र पौडेलले जलेको शीतल निवासको आँगनमा बसेर महत्त्वपूर्ण भूमिका निर्वाह गरेको खड्काले बताए ।
उनले देशलाई निकास दिनका लागि कांग्रेसले मियोको काम गर्ने उल्लेख गरे । ‘संविधान, लोकतन्त्र र नेपाली नागरिकको रक्षाका लागि समर्पित हुन्छौं ।
विगतका सबै कुराको निर्मम समीक्षा गर्दै, २४ को घटनाले दिएका सन्देशको समीक्षा गर्दै कहाँ-कहाँ के कुरा कारक भए ? त्यो समीक्षा र स्वीकारोक्तिको जगमा कांग्रेसले केन्द्रीय बैठकबाट निर्णय गर्छौं,’ खड्काले भने ।
