रवि र छविको मुद्दाको सुनुवाइ स्थगित, रविका कानून व्यवसायीले नै दिएका थिए सुनुवाइ स्थगितको निवेदन

बुटवल, बुटवलको सुप्रिम सहकारी संस्थाको रकम ठगी र संगठित अपराध अभियोगमा थुनामा रहेका राष्ट्रिय स्वतन्त्र पार्टी (रास्वपा) सभापति रवि लामिछाने र तात्कालीन गोर्खा मिडियाका सञ्चालकसमेत रहेका पूर्वडीआईजी छविलाल जोशीको मुद्दाको सुनुवाइ स्थगित भएको छ ।

उनीहरूको मुद्दा आज न्यायाधीशद्वय सानुमैया डंगोल र मिलनकुमार राईको ३ नं इजलासमा परेको थियो ।

रविका कानून व्यवसायीले सुनुवाइ स्थगित गरीपाउँ भनी निवेदन दिएकाले सुनुवाइ स्थगित भएको अदालतका सूचना अधिकारी रामबहादुर कुँवरले जानकारी दिए ।

यसअघि अघिल्लो बिहीबार पनि रविका कानुन व्यवसायीका तर्फबाट बुटवल इजलासको सुनुवाइ स्थगित गरिदिन निवेदन परेपछि स्थगित भएको थियो ।

यसअघि कात्तिक २७ गते भएको सुनुवाइमा न्यायाधीशहरू ओमप्रसाद अर्याल र वासुदेव आचार्यको इजलासले सर्वोच्च अदालतमा रहेको मूल अभियोगको मिसिल मगाउने आदेश दिएको थियो ।

मूल मुद्दाको सक्कल मिसिल प्राप्त भएपछि अघिल्लो बिहीबारका लागि पेसी तोकिए पनि सुनुवाइ स्थगित भएको थियो ।

रवि लामिछाने र जोशी दुवै जना बुटवलको सुप्रिम सहकारी ठगीको मुद्दामा पुर्पक्षका लागि थुनामा छन् ।

लामिछाने भैरहवा कारागार हुँदै नख्खु कारागारमा छन् भने लामिछाने भैरहवा कारागारमै छन् ।

बुटवलको सुप्रिम सहकारी ठगीमा रवि लामिछानेसहितका प्रतिवादीलाई १० करोड ९९ लाख ३६ हजार रुपैयाँ सामूहिक बिगो कायम गरेर अभियोगपत्र दायर गरिएकोमा लामिछानेले त्यसको चार भागमध्ये आफ्नो भागको एक भाग बराबर बिगो दाखिला गरेको कागजात पेस गरेका थिए ।

लामिछानेले २ करोड ७४ लाख ८४ हजार रुपैयाँको बैंक जमानत निवेदनसाथ पेस गरेका थिए । लामिछानेले जस्तै जोशीले पनि त्यति नै बिगो बापतको जमानत पेस गरेका थिए ।

तर, दुवै प्रतिवादीको हकमा उनीहरूको भागमा कति बिगो कायम हुने भन्ने नै यकिन नभएकाले रिहा गर्न नमिल्ने एकै प्रकृतिको आदेश अदालतले गरेको थियो ।

सहकारीमा अपचलन गरेको आफ्नो भागको बिगो रकम दाखिल गर्दा पनि रुपन्देही जिल्ला अदालतका न्यायाधीश नारायण सापकोटाको इजलासले साउन २६ गते रिहा गर्न अस्वीकार गरेपछि उनले जिल्लाको आदेशविरुद्ध गत भदौ ९ गते उच्च अदालतमा निवेदन दर्ता गराएका थिए ।

सोही मुद्दाको बारेमा आजलाई पुनः पेसी तोकिएको हो ।