काठमाण्डू, साताको तेस्रो कारोबार दिन आज सेयरबजार झिनो अंकले घटेको छ ।
आज नेपाल स्टक एक्सचेञ्च (नेप्से) परिसूचक ०.०२ प्रतिशत अर्थात ०.५३ अंकले घटेर २ हजार ६६४.७० विन्दूमा सीमित बनेको छ ।
यो दिन बलिया र राम्रा कम्पनीको मापक सेन्सेटिभ इन्डेक्स पनि ०.२७ प्रतिशतले घटेर ४५३.९९ विन्दूमा सीमित बनेको छ ।
यो दिन नेप्सेमा सूचीकृत मध्ये ३२४ वटा स्क्रिप्टको १ करोड ८ लाख १० हजार १०६ कित्ता सेयर ४ अर्ब ४८ करोड १३ रुपैयाँभन्दा बढीको कारोबार भएको छ ।
यो दिन नेप्सेमा सूचीकृत १३ वटा समूहमध्ये ५ वटा बाहेक अन्य सबैमा हरियाली छायो ।
व्यापार समूह आज सर्वाधिक अर्थात ०.७५ प्रतिशतले बढ्यो । यस्तै विकास बैंक समूह ०.१७, फाइनान्स ०.२७, हाईड्रो ०.७०, उत्पादन तथा प्रशोधन ०.५१, म्युचुअल फण्ड ०.२५, निर्जीवन बीमा ०.२६ र व्यापार समूह ०.७५ प्रतिशतले बढ्यो । अन्य समूह पनि आज ०.०७ अंकले बढ्यो ।
आज होटल समूह सर्वाधिक अर्थात ०.६२ प्रतिशतले घट्यो । बैंकिङ समूह ०.५८ प्रतिशत, लगानी ०.०४, जीवन बीमा ०.५७ र लघुवित्त ०.०६ प्रतिशतले घट्यो ।
धेरै कारोबार गर्ने कम्पनीहरु
यो दिन युनियन हाईड्रोको सर्वाधिक सेयर कारोबार भयो । आज यो कम्पनीको ३१ करोड ८१ लाख बढीको सेयर कारोबार भयो ।
यस्तै माउन्टेन इनर्जीको २२ करोड ९४ लाख, ङादी ग्रुप पावरको १६ करोड १६ लाख, ग्रीन भेन्चर्सको ११ करोड ११ लाख र युनाइटेड मोदीको १० करोड ६९ लाख बढीको सेयर कारोबार भयो ।
धरै कमाउने र गुमाउने कम्पनीहरु
आज नेप्सेमा कारोबार भएका ६ वटा कम्पनीको सेयरमूल्यमा अपर सर्किट लाग्यो ।
आज सागर डिष्टिलरी, स्वस्तिक लघुवित्त, झापा इनर्जी,माबिलुङ इनर्जी, बुङ्गल हाईड्रो र श्रीनगर एग्रोटेकको सेयरमूल्यमा अपर सर्किट लाग्यो ।
यस्तै रसुवागढी हाईड्रोपावरको सेयरमूल्य ८.६१ प्रतिशत, विकास हाईड्रोको ६.४८ र दरमखोला हाईड्रो इनर्जीको सेयरमूल्य ६.२७ प्रतिशतले बढ्यो ।
यो दिन ग्रीन भेन्चर्सको सेयरमूल्य सर्वाधिक अर्थात ९.८५ प्रतिशतले घट्यो । स्ट्याण्डर्ड चाटर्ड बैंकको सेयरमूल्य पनि आज ३.८८ र पोखरा फाइनान्सको सेयरमूल्य २.५० प्रतिशतले घट्यो ।
