काठमाण्डू, नेपाली कांग्रेसको केन्द्रीय कार्यसम्पादन समिति बैठक आज पनि बस्दैछ । बैठक केन्द्रीय कार्यालय सानेपामा बिहान ११ बजे बस्न लागेको हो ।
बैठकमा उम्मेदवार छनोट र अन्य दलसँगको चुनावी तालमेलका विषयमा छलफल हुँदैछ ।
निर्वाचनमा सिट बाँडफाँटका विषयमा नेकपा एमाले र माओवादी केन्द्रलगायतका दलहरूसँग शीर्ष तहमा छलफल जारी रहेको कांग्रेसले जनाएको छ ।
राष्ट्रिय सभामा कांग्रेसको प्रतिनिधित्व सुनिश्चित गर्न र निर्वाचन जित्न सक्ने आधार तय गर्न अन्य राजनीतिक शक्तिहरूसँग सहकार्यको हात बढाइएको हो ।
यही तयारीअनुसार सोमबार साँझ कांग्रेसका कार्यवाहक सभापति पूर्णबहादुर खड्काले एमाले अध्यक्ष केपी शर्मा ओलीसँग गुन्डु पुगेर भेटवार्ता गरेका थिए ।
