नेपाल सरकारकाे भौतिक पूर्वाधार तथा यातायात मन्त्रालयले नागढुंगा सुरुङ मार्गमा चल्ने सवारी साधनको शुल्क सार्वजनिक गरेको छ । नेपाल सरकार मन्त्रिपरिषद्ले सडक बोर्ड ऐन, २०५८ को दफा ६ को उपदफा (१) ले दिएको अधिकार प्रयोग गरी नागढुंगा सुरुङमार्ग खण्डमा चल्ने सवारी साधनबाट सुरुङमार्ग उपभोगबापत दस्तुर लिने निर्णयअनुसार दर सार्वजनिक गरेको हाे ।
मन्त्रालयले आज राजपत्रमा सूचना जारी गर्दै सुरुङमार्ग खण्डमा चल्ने सवारी साधनबाट सुरुङमार्ग उपभोगबापत दस्तुर सार्वजनिक गरेकाे हाे । यसअघि गत साउन २६ गते मन्त्रिपरिषद्ले उक्त निर्णय गरेको र सोही आधारमा आज राजपत्रमा सूचना प्रकाशित गरी दर सार्वजनिक गरिएको हो ।
सार्वजनिक दस्तुर अनुसार कार, भ्यान, पिकअप ट्याक्टर, माइक्रो बस र अन्य हलुका सवारीसाधन काठमाडौँ प्रवेश गर्दा रु. ६५ र बाहिरिँदा रु ६०, मिनी बस, मिनी टिपर/ट्रकको प्रवेशका लागि रु. ११५ र बाहिरिँदा रु. ८० तथा बस, ट्रक (सिंगल रियर एक्सल) प्रति सवारीसाधन प्रवेश गर्दा रु. २६० र बाहिरिँदा रु २०० शुल्क तोकिएको छ ।
त्यस्तै मल्टी एक्सल ट्रक/सवारीसाधन तथा भारी उपकरणको हकमा प्रवेश गर्दा र ६०० र बाहिरिँदा रु. २५० शुल्क तोकिएको छ ।
