त्रिभुवन अन्तर्राष्ट्रिय विमानस्थल दैनिक सात घण्टा बन्द हुने भएको छ । आगामी जेठ ४ गतेसम्म राति पाैने १२ बजेदेखि बिहान साढे ६ बजेसम्म विमानस्थलको उडान तथा अवतरण बन्द हुने भएकाे हाे ।
विमानस्थलको धावनमार्गको छेउमा रहेको ट्याक्सीवेमा निर्माण जारी रहेकाे र पूर्वाधार निर्माणलाई थप गति दिन विमानस्थल दैनिक सात घण्टा बन्द हुने भएको हाे । सुरक्षाका दृष्टिकोणले रातको समयमा विमानस्थल पूर्ण रूपमा बन्द गरिन लागिएको बताइएकाे छ ।
विमानस्थल कार्यालयद्वारा जारी सूचना अनुसार निर्माणलाई गति दिन विमानस्थल बन्द गरिने हुँदा त्यसबाट पर्न जाने असरलाई न्यूनीकरण गर्न आवश्यकताअनुसार उडान तथा अवतरणको कार्यतालिका निर्धारण गर्न हवाई सेवा प्रदायकलाई विमानस्थल कार्यालयले आग्रह गरेको छ ।
