अबदेखि कर्मचारीको हाजिरी विवरण प्रत्येक १५ दिनमा प्रमाणित गर्नुपर्ने भएको छ । संघीय मामिला तथा सामान्य प्रशासन मन्त्रालयले सबै मन्त्रालय, विभाग, कार्यालय, निकाय र स्थानीय तहलाई परिपत्र गर्दै यस्तो निर्देशन दिएको हो । मन्त्रालयले सरकारी निकायमा विद्युतीय हाजिरी प्रणाली अनिवार्य गर्दै त्यसमा उल्लेख भएझैं कर्मचारी कार्यालय उपस्थित भए–नभएको कुरा प्रत्येक १५ दिनमा प्रमाणित गर्न भनेको छ ।
‘कर्मचारीको दैनिक उपस्थिति (आएको तथा गएको) विवरण अनिवार्य रुपमा विद्युतीय हाजिरी प्रणालीबाटै गर्ने व्यवस्था मिलाउनुहुन र प्रत्येक १५ दिनको हाजिरी विवरण प्रिन्ट गरी, प्रमाणित गरी सो अभिलेख कार्यालयमा सुरक्षित राख्नसमेत यस मन्त्रालयको निर्णयानुसार अनुरोध छ,’ परिपत्रमा उल्लेख छ ।
