इलाममा कुखुरा र कुखुराको मासु ओसारपसार पूर्ण रुपमा निषेध गरिएको छ । पछिल्लो समय देखिएको बर्ड फ्लु रोग नियन्त्रणका निम्ति यस्तो निर्णय गरिएको हो ।
जिल्ला प्रशासन कार्यालयले एक सूचना जारी गर्दै अर्को निर्णय नभएसम्मका लागि कुखुरा र कुखुराको मासु अन्य जिल्लाबाट ओसारपसार वा भित्र्याउन निषेध गरिएको बताएको छ ।
अण्डा र चल्लाको हकमा रोग फैलिएका जिल्ला झापा, मोरङ, सुनसरीबाहेक अन्यत्रबाट पशु चिकित्सकको प्रत्यक्ष निगरानीमा ओसारपसार तथा भित्र्याउन सकिने प्रशासनको भनाइ छ ।
यद्यपि, कुखुरा व्यवसायी संघले जिल्लाभरिका कृषकका अण्डा र चल्लाको माग संकलन गरेर उत्पादक, ह्याचरी, ढुवानी साधनको समेत विवरण खुलाई प्रवेश नाकामा आइपुग्नु २४ घण्टाअगावै भेटेरिनरी अस्पताल तथा पशु सेवा विज्ञ केन्द्रसँग अनुमति लिनुपर्ने छ ।
यस्तै, कुखुराको दाना मापदण्ड पूरा गरेर ओसारपसार वा ल्याउन सकिनेछ । प्रशासनले यी कार्यको अनुगमनका लागि टोलीसमेत गठन गरिएको र सो टोलीले नियमित अनुगमन गरी प्रतिवेदन बुझाउने बताएको छ ।
