आज देशभर विविध कार्यक्रमकाे आयोजना गरी २०औँ लोकतन्त्र दिवस मनाइँदै छ । विसं २०६३ वैशाख ११ गते लाेकतन्त्र स्थापना भएकाे अवसर पारेर २०६४ सालदेखि लोकतन्त्र दिवस मनाउन थालिएको हो ।
विसं २०६३ वैशाख ११ गते तत्कालीन राजा ज्ञानेन्द्रले आन्दोलनरत दलको मार्गचित्रबमोजिम विसं २०५९ जेठ ८ गते विघटन भएको संसद् पुनर्स्थापना गरेका थिए । आन्दोलनरत दलको मार्गचित्रबमोजिम संसद् पुनर्स्थापना भएपछि जनताको विजय भएको खुसीयालीमा २०६४ देखि देशभर लोकतन्त्र दिवस मनाउन थालिएको हो ।
२०५९ असोजमा संसद् विघटनपछि सशस्त्र द्वन्द्वका कारण निर्वाचन हुन नसक्दा राजाले इच्छा लागेका मानिसलाई प्रधानमन्त्री बनाउने र हटाउने शृङ्खला चलाएका थिए । राजा ज्ञानेन्द्रले लोकेन्द्रबहादुर चन्द, सूर्यबहादुर थापा र शेरबहादुर देउवा गरी तीन जनालाई प्रधानमन्त्री बनाउँदै हटाउँदै गरेका थिए ।
त्यसपछि विसं २०६१ माघ १९ गते राजा ज्ञानेन्द्रले शासन सत्ता आफ्नै हातमा लिएपछि आन्दोलनरत सात दल र तत्कालीन सशस्त्र युद्धरत नेकपा (माओवादी)का बिच १२ बुँदे समझदारी हुँदै देशमा परिवर्तन भएकाे थियाे ।
२०६२ मङ्सिरमा १२ बुँदे समझदारीका माध्यमबाट तीन ध्रुवमा विभाजन भएका राजनीतिक शक्ति दुई ध्रुवमा आएपछि आन्दोलनले गति लियो भने २०६२ फागुनदेखि पूर्व प्रधानमन्त्री एवं नेपाली काँग्रेसका तत्कालीन सभापति गिरिजाप्रसाद कोइरालाको नेतृत्वमा निर्णायक आन्दोलन भएकाे थियाे ।
२०६३ सालकाे नयाँ वर्षसँगै लाखौँ जनता सडकमा आएर चक्रपथ मानव सागरले भरिएपछि राजा ज्ञानेन्द्र दलहरूको मार्गचित्रमा सहमत भए भने आन्दोलनरत दलले गरेकै मस्यौदाका आधारमा राजा ज्ञानेन्द्रले वैशाख ११ गते राति संसद् पुनर्स्थापनाको घोषणा गरी बैठक आह्वान गरेकाले यस दिनलाई लोकतन्त्र दिवसकाे रुपमा मनाउन थालिएकाे हाे ।
