महाेत्तरीमा चार महिनामा २०९ जनाले आमाको नामबाट नागरिकता पाएका छन् । गत २०८२ पुस ११ गतेको मन्त्रिपरिषद्को बैठकले निर्णय गरेअनुसार बाबुको पहिचान नखुलेका सन्तानलाई आमाको नामबाट नागरिकता दिने व्यवस्था गरेपछिकाे चार महिनामा २०९ जनाले आमाको नामबाट नागरिकता पाएका हुन् ।
गत २०८२ पुस ११ गतेको मन्त्रिपरिषद्को बैठकले निर्णय अनुसार पुस २१ गते नेपाल राजपत्रमा सूचना प्रकाशित भएलगत्तै सबै जिल्ला प्रशासन कार्यालयहरुमा परिपत्र गरी आमाको नामबाट नागरिकता दिने व्यवस्था कार्यान्वयनमा ल्याइएको थियो ।
सोही व्यवस्था बमाेजिम सबै आवश्यक कागजी प्रक्रिया पूरा गरि २०८२ माघ ६ गतेदेखि जिल्ला प्रशासन कार्यालयबाट आमाको नामबाट नागरिकता वितरण सुरु गरिएको प्रमुख जिल्ला अधिकारी इन्द्रदेव यादवले जनाएका छन् । साेहि अनुसार नेपाली नागरिक आमाबाट नेपालमै जन्मिएका र बाबुको पहिचान हुन नसकेका व्यक्तिहरुले आवश्यक स्वघोषणा र प्रक्रिया पूरा गरेर वंशजका आधारमा नागरिकता प्राप्त गर्न थालेका हुन् ।
जिल्ला प्रशासन कार्यालय महाेत्तरीबाट गत २०८२ माघ महिनाको ६ गतेदेखि २०८३ जेठ ९ गतेसम्म जम्मा २०९ जनाले आमाको नामबाट वंशज नागरिकता प्राप्त गरेको प्रमुख जिल्ला अधिकारी यादवले बताएका छन् ।
