सरकारकाे पूर्वाधार विकास मन्त्रालयले आगामी आर्थिक वर्ष २०८३/८४ मा एक दर्जन सुरुङमार्गको सभ्भाव्यता अध्ययन र निर्माणका लागि ६७ करोड एक लाख बजेट विनियोजन गरेको छ । आगामी आवको लागि वार्षिक विकास कार्यक्रमअन्तर्गत सो योजना समावेश गरेको हाे ।
हालै सार्वजनिक गरेको वार्षिक विकास कार्यक्रमअन्तर्गत सो योजना समावेश गरेको र मन्त्रालयले आगामी आवका लागि निर्माणाधीन सिद्धबाबा सुरुङमार्ग निर्माणका लागि ५० करोड बजेट विनियोजन गरेको बताएकाे छ ।
त्यसैगरि ग्वार्को सातदोबाटो एकान्तकुना फ्लाइओभरका लागि १२ करोड ६६ लाख छुट्याएको छ भने सुरुङमार्ग विकास कार्यक्रमका लागि तीन करोड ७७ लाख ८० हजार बजेट छुट्याएको छ ।
मन्त्रालयले टोखा छहरे गुर्जु भन्ज्याङ सुरुङमार्गका लागि ११ लाख ४८ हजार बजेट विनियोजन गरेको छ भने विभिन्न प्रस्तावित सुरुङमार्गहरुको सम्भाव्यता अध्ययनका लागि १ लाख ९० हजार बजेट छुट्याएको छ ।
मन्त्रालयले सुर्खेतको भेरी नदीदेखि बर्दियाको दानुवा तालसम्म सुरुङमार्ग अध्ययनका लागि ५ लाख ६० हजार, दोलालघाट चर्नावती सुरुङमार्गका लागि १८ लाख ९० हजार, हात्तीसार बबई सुरुङमार्गका लागि ७ लाख ५६ हजार छुट्याएको छ । त्यस्तै खुर्कोट चियाबारी सुरुङमार्गको अध्ययनका लागि ३ लाख ९२ हजार विनियोजना गरेको छ ।
शिवपुर भालुवङ्ग सुरुङमार्गका लागि ३ लाख ९२ हजार र रानीघाट भुरीगाउँ सुरुङमार्गका लागि ३ लाख ९२ हजार बजेट छुट्याएको मन्त्रालयले जनाएकाे छ ।
