काठमाडौँ उपत्यकासहित देशकाे विभिन्न जिल्लामा बर्डफ्लुको संक्रमण फैलिएको छ । तीन महिनादेखि विभिन्न स्थानमा देखिन थालेको बर्डफ्लु हालसम्म झापा, मोरङ, सुनसरी, महोत्तरी, बारा, चितवन, नवलपरासी, काठमाडौँ, भक्तपुर, ललितपुर र काभ्रेपलाञ्चोक गरी ११ जिल्लाका ८२ स्थानमा पुष्टि भइसकेको पशु सेवा विभागले जनाएको छ ।
गत चैतमा मोरङमा देखिएकाे बर्ड फ्लु रोगबाट प्रभावित ५ लाख ६९ हजार ८५८ पन्छी नष्ट गरिएको छ भने ९ लाख ८९ हजार ३१३ अण्डा र १ लाख ९५ हजार ४८५ केजी दाना समेत नष्ट गरिएको विभागले जनाएको छ ।
विभागका महानिर्देशक डा. उमेश दाहालका अनुसार अहिले झापा, मोरङ र सुनसरी, बारा, महोत्तरी, चितवन र नवलपरासीमा बर्डफ्लु रोग नियन्त्रणमा आइसकेको भएपनि कोसी प्रदेशमा लगाइएको एक महिने पन्छी ओसारपसार र प्रतिबन्ध खुकुलो बनाइएको छ ।
पछिल्लाे समय उपत्यकाकाे तीनवटै जिल्ला र काभ्रेका केही स्थानमा यो रोग देखा परेकाले सुरक्षाको उपाय अपनाउन विभागले सबैमा अनुरोध गरेको छ ।
