महोत्तरीका दुई चिनी उद्योगमा बुझाइएको उखुको झण्डै दुई अर्ब रुपैयाँ किसानले भुक्तानी पाएका छन् ।
जिल्लाकाे एभरेष्ट सुगर एण्ड केमिकल इन्डष्ट्रिज र सिद्धि विनायक सुगर एण्ड केमिकल इन्डष्ट्रिजमा बुझाइएको उखुको रकमबापत एक अर्ब ७६ करोड ५२ लाख ४६ हजार ४५५ रुपैयाँ किसानले भुक्तानी पाएका हुन् ।
जिल्ला प्रशासन कार्यालय महोत्तरीका अनुसार दुवै उद्योगमा गरेर किसानले २८ लाख ६७ हजार ९८६ क्विन्टल ९६ किलो उखु आर्थिक वर्ष २०८२–८३ को याममा बुझाइएका थिए । उखुको मूल्यबापत हुने एक अर्ब ७७ करोड ३४ लाख ३७ हजार २३२ मध्ये एक अर्ब ७६ करोड ५२ लाख ४६ हजार ४५५ भुक्तानी भइसकेको बताइएकाे छ ।
यसैगरी, सरकारले उखु किसानलाई दिने अनुदानबापतको रकम भुक्तानीका लागि कोष तथा लेखा नियन्त्रक कार्यालय महोत्तरीलाई सिफारिस गरिएको छ । जिल्ला भुक्तानी समितिले अहिले २० करोड ७ लाख ५९ हजार ११७ अनुदान भुक्तानीका लागि सिफारिस गरेको कार्यालयका प्रशासकीय अधिकृत कामेश्वर यादवले जनाएका छन् ।
जिल्लामा भुक्तानी सिफारिसका लागि प्रमुख जिल्ला अधिकारीको अध्यक्षतामा भुक्तानी समितिको व्यवस्था छ । त्यस्तै यसपालीको उखुबापतको मूल्य र अनुदान सबै भुक्तानी यसै असार मसान्तभित्र भइसक्ने जिल्ला प्रशासन कार्यालय महोत्तरीले जनाएको छ ।
