त्रिपुरेश्वरस्थित राहदानी विभाग अगाडी आत्मदाहको प्रयास गरी गम्भीर घाइते भएका गणेश नेपालीको निधन भएकाे छ । मुगुको सोरु गाउँपालिका–१, निवासी २५ वर्षीय नेपालीको वीर अस्पतालमा उपचारका क्रममा निधन भएको हाे ।
अस्पतालको सघन उपचार कक्ष (आईसीयू) मा उपचार गराइरहेका नेपालीको बिहान सवा ११ बजे निधन भएकाे जिल्ला प्रहरी परिसर काठमाडौँका एसएसपी दिलीप घिमिरेले जानकारी दिएका छन् । अस्पतालमा उपचार गराइरहेका नेपालीको स्वास्थ्य अवस्था थप बिग्रिएपछि मृत्यु भएको बताइएकाे छ ।
यसअघि वीर अस्पतालले पत्रकार सम्मेलन गरी नेपालीको स्वास्थ्य अवस्था अत्यन्तै अस्थिर रहेको र जुनसुकै समयमा थप जटिलता आउन सक्ने जानकारी दिएकाे थियो । अस्पतालका चिकित्सकहरूले उनको स्वास्थ्य अवस्थाका बारे केही भन्न नसकिने र जुनसुकै बेला पनि परिस्थिति गम्भीर बन्न सक्ने बताएका थिए ।
चिकित्सकहरूको प्रयासका बाबजुद उनको ज्यान जोगाउन नसकिएको अस्पताल स्रोतले जनाएको छ ।
