हरेक वर्षा झैं यसवर्ष पनि आदिकवि भानुभक्त आचार्यको २१३औँ जन्मजयन्ती मनाइँदैछ । आज देश तथा विदेशमा रहेका नेपालीले विभिन्न कार्यक्रमको आयोजना गरी जन्मजयन्ती मनाउन लागेका हुन् ।
भानुभक्त आचार्यले संस्कृत भाषामा लेखिएको रामको जीवनीलाई भावानुवादसहितको ‘रामायण’ प्रस्तुत गरेर नेपालीलाई ठूलो गुन लगाएका छन् । उनले लेखेको रामायण अहिले पनि नेपालीको घरघरमा सस्वर लय हालेर पाठ गरिन्छ ।
विसं १८७१ असार २९ गते तनहुँको चुँदीरम्घामा जन्मिएका भानुभक्त एक सामान्य घाँसीकाे प्रेरणाबाट प्रेरित भइ रामायणलाई नेपालीमा रचना गरेका थिए । ‘वधुशिक्षा’ ‘प्रश्नोत्तर’, ‘भक्तमाला’, ‘रामगीता’, फुटकर रचनालगायत उनका कृति हुन् ।
नेपाल प्रज्ञा प्रतिष्ठान परिसरमा रहेको आदिकवि भानुभक्तको प्रतिमामा माल्यार्पणसहित विशेष कार्यक्रमको आयोजना गरिएको छ । भानुभक्तको जन्मजयन्ती नेपाललगायत भारतको दार्जिलिङ, सिक्किम, भुटान, बर्मालगायत नेपाली भाषाभाषी धेरै रहेका देश एवं स्थानमा मनाउने गरिन्छ ।
